MASHONALAND WEST - Umkhokheli webandla leCitizens Coalition for Change (CCC), uMnu. Nelson Chamisa, uthi nxa engavotelwa ilizwe leZimbabwe lizakwamukela wonke umuntu, okugoqela uMnu. Saviour Kasukuwere loSikhwicamfundo Jonathan Moyo ababaleka ngesikhathi ibutho lisusa esikhundleni owayengumongameli, umuyi uRobert Mugabe ngomnyaka ka2017.
UChamisa, owethule amazwi la emhlanganweni wokukhankasela ukhetho oluzayo eMurombedzi Growth Point esabelweni seMashonaland West, uthe kuqakathekile ukuba abantu beZimbabwe behlale ngokuthula njalo bexolelane.
UKasukuwere loMoyo babekucele leGeneration 40 kubandla leZanu elalifuna kungene omunye umuntu esikhundleni sika Mugabe hatshi uMnu. Emmerson Mnangagwa, owayesexotshwe esikhundleni somsekeli kamongameli.
UMugabe wathi uMnangagwa wameyisa njalo wadelela lesikhundla sikamongameli ngokunye ayekwenza okungekho emthethweni.
UMnangagwa wabaleka waya kwele South Africa waphindela ekhaya ibutho selisuse uMugabe esikhundleni libambisana ledale lephalamende, ibandla leZanu PF, ezinye inhlanganiso ezizimeleyo lozulu.
Kasenelisanga ukukhuluma loKasukuwere kanye loMoyo ngokwethulwe nguChamisa.
Kusenjalo, uChamisa uthe esuka lapho waya eChegutu enkundleni yePfupajena lapho athole kulenkungwane zabantu.
UChamisa utshele abasekeli bakhe ukuba uhulumende weZANU PF wenza ukuthi abantu behambe kwamanye amazwe ngenxa yesimo esibi somnotho.
UMnu. Mabutho Moyo, okubandla leZanu PF, uthe uChamisa uyaphosisa.
“Akula muntu omkholwayo uChamisa. Lokho akutshoyo uyaphupha nje. Akula okukhulumayo okuzaba liqiniso."
Umsekeli wesikhulumeli sebandla leli, uMnu. Gift Ostalos Siziba, wazise ukuba uhulumende kaChamisa uzaguqla impilo kazulu.
Kumihlangano yakhe uChamisa bayala besiba banengi abantu abamlandelayo. NgoLwesine ukhangelelwe ukuba uzakhankasela ukhetho eKadoma. Uzakhuluma lozulu ngoLwesihlanu eHurungwe leMarondera ngempelaviki.
Forum