BULAWAYO - Abezempilakahle bathi umuntu uma esiya lahla amanzi kanenginengi ngelanga kuveza ukuba engaba lomkhuhlane wemvukuzane leminye. Isigaba lesi sokuya esambuzini okungapheliyo sibizwa ngeSilungu ngokuthi yi-nocturia.
Odokotela bathi isimo lesi kumele sihlolwe ukwenzela ukuba umuntu engabanjwa ngumkhuhlane wemvukuzane, itshukela leminye.
UDokotela Peter Mataruse, ingcwethi kwezemikhuhlane efana lemvukuzane letshukela, uthi isimo se-nocturia kumele sihlolisiswe kabanzi zingcwethi kwezempilakahle. Eyinye yalez’ingcwethi, uSikhwicamfundo Solwayo Ngwenya, uchasisa kabanzi ngalokhu.
"Igama elithi nucturia kutsho ukuthi umuntu uyathambisa ebusuku kanengi nengi lokhu kutsho ukuthi uyabe esehlaselwe ngumkhuhlane kuprostate kuyabe sekumele ukuba ayelatshwe umuntu kumele athambise kabili ebusuku kungedlula lapho uyabe usuhlaselwe ngumkhuhlane kumithambo yensitha."
USikhwicamfundo Ngwenya uqhubekele phambili ekhuthaza abantu ukuba bayehlolwa ngodokotela sonke isikhathi.
"Sekumele umuntu ayebona udokotela ukuze ahlolwe ngoba ngokuya kwesikhathi kuyabangela eminye imikhuhlane ebalisa itshukela lemvukuzane."
USikhwicamfundo Ngwenya uqhubekele phambili esithi ukukhula kwe-prostate kuyavala indlela yemithambo yemithambiso okwenza ukuba owesilisa abe esiya esambuzini kanenginengi ngoba umthambiso uyabe usuphuma kancane kancane. Umqondisi weNational Cancer Registry, uMnu. Eric Chokunonga, uthi ucwaningo olwenziwa ngomyaka ka2018 lwaveza ukuba imvukuzane yeprostate yiyo ebamba abesilisa abanengi.
Ucwaningo olwenziwa njalo yiZimabwe Diabetic Association, lwaveza ukuba banengi abantu eZimbabwe asebetholakala belomkhuhlane wetshukela. Abanye babo bacina bengasaboni kumbe bequnywa izitho zomzimba.
Inhlanganiso le ithi abantu abalitshumi ekhulwini babulawa ngumkhuhlane wetshukela kuthi abangaba zinkulungwane ezilikhulu – 100,000 bayelatshwa umkhuhlane wetshukela ezibhedlela zikahulumende eZimbabwe.
Inhlanganiso yamazwe omhlaba yezempilakahle iWorld Health Organisation ithi umkhuhlane wetshukela usuluhlupho olukhulu emhlabeni wonke jikelele ngoba abantu abedlula izigidi ezingamakhulu amane - 422 million baphila lalo umkhuhlane.
Forum