HARARE - Abebandla leCitizens Coalition for Change (CCC) bathi ugwalo lwababhalisa ukuthola ilungelo lokuvota olwe Voters Roll lwalonyaka, lunzima ukuluhlolisisa kakuhle ukuze lubaphathise ukulungiselela ukhetho lwalonyaka. Kungalesi sizatho bethi sebelobele iZEC ukuze bathole iVoters Roll ngokuphangisa ebaleka kuhle.
Lokhu kuphuma emhlanganweni owenziwe ngabeCCC lentathelizindaba e Harare namhlanje.
Ekhuluma emhlanganweni lo umsekeli kanombala wezokhetho kubandla leli uNkosikazi Ellen Shiriyedenga ubekhonona ngokuthi iVoters Roll abalayo kayibaleki amabizo ngoba ikumhlobo we phepha le PDF khona okwenza kube nzima ukulihluzisisa.
"Kulokwephula umthetho ikakhulu lapho othi kumele umuntu enelisa ukuhluzisisa ivoters enelise ukuba ukuba abantu abakhonapho bangaki.IkuPDF format engakhangekeliyo."
Uqhubeke esithi badaniswa yikuba abantu abanengi lokhu bengatholi amabizo abo ku voters roll esithi lokhu kumele kulungiswe njalo uthi kumele ZEC ikhulumisane lamabandla aphikisayo ingakabeki indawo zokuvotela zamapolling stations.
"Ama polling stations,iZEC kumele iwabeke kuviki ezayo. Amabandla alelungelo lokuhlala phansi le ZEC. Sithole ukukhalaza ukuba abantu balamapolling stations asendaweni ezikhatshana."
Uphinde wakhalaza ngokubotshwa okwenziwa amaluga ebandla lakhe abancintisa ukuthola izikhunda edaleni lephalamende kukhetho lwalonyaka abagoqela uCorban Madziva oweMbizo, eKwekwe loClifford Hlatshwayo eChipinge South ababotshiweyo okwesikhatshane bekhankasela ukuthola usekelo lokuvotelwa.
Abebandla le ZAPU labo bakhala ngokuthi amalunga alo abanengi ikakhulu abemaphandleni abakatholi ugwalo lwe voters roll.
"Thina njenge ZAPU silenkinga ezimbalwa okwakuqala yikuthi abanengi bethu abakatholi ivoters roll. EMat Sputh siqala ukuyayithatha kuyonale iviki. Bayayithola ikuformat ezima ukuhlolisisa."
Kodwa ozancintisa edinga ukumela ibandla le ZANU PF ko Bulawayo, uMnu Mabutho Moyo uthi amabandla aphikisayo ahlala ekhalakhala zikhathi zonke.
"Akulanto enhle kibo vele bayabona ukuthi sebesiyadliwa. Sebedinga indlela zokuthi bebe lobazakukhuluma benganqotshwa. Uzulu kabathathi njengabantu abazimiselayo,”
Imizamo yokuthola umbono we ZEC yehlule ngemva kokuba isikhulumeli se ZEC uMnu Rodney Kiwa ethumele umbiko othi ubambekile ekenelisi ukukhuluma lathi.
Ingcwethi ezicubungula ezombusazwe kanye labamabandla aphikisayo bathi isikhathi sesisifitshane kakhulu ukuthi kube lokudonselana ngokudingekayo ukulungiselela ukhetho lwalonyaka. Sokusele inyanga eyodwa ukuthi luqhutshwe ukhetho lokudinga amakhansila, amalunga edale lephalamende lomongameli welizwe, ngenyanga ezayo kaNcwabakazi
Forum