UMongameli Emmerson Mnangagwa usesayine umthetho weCriminal Law Codification Reform Act (CODE) Amendment owaziwa njalo ngokuthi yiPatriotic Act, ozakwenza kube licala ukuhlambaza ilizwe leZimbabwe.
Umabhalane omkhulu ehofisini kamongameli lakudale labampantintambo ele cabinet, umnuzana Misheck Sibanda, nguye owethule isaziso sokusayinwa kwalumthetho ngumongameli esiphume kugwalondaba lukahulumende olweGovernment Gazette, namhlanje.
Uhulumende uthi lumthetho ujonge ukubamba labo athi badingela ilizwe izijeziso zomnotho, ubonakala njenge ndlela yokuhlasela labo abalombono owehlukile lokahulumende.
Lokhu kwamukelwe ngokudana okukhulu ngabamabandla aphikisayo kanye lenhlanganiso ezilwela ilungelo loluntu besithi uzaqinisa umbuso wentando kayiphikiswa.
Umsekeli wesikhulumeli seCCC, uMnu Felix Magalela Mafa uthi bayethuswe kakhulu yikubekwa kwalumthetho esithi uveza sobala ukuba elizweni kakusela mbuso wentando kazulu.
“Kuyahlukumeza umzimba ngenxa yokuthi ukubusa sokubaphambanise ikhanda abantu be ZANU PF. UMthetho lo uzancindezela uzulu we Zimbabwe. Uzasebenza amapholisa lama CIO njenge sikhathi sika Hittler. Abantu kumele bawale”
Lokhu kusekelwe nguMnu Daniel Molokele ummeli we Hwange Central edale lephalamende yena othi lumthetho uzakwenza kube nzima ukumsola uhulumende kumbe ukumkhuza lapho ephosisa.
“Kungizwisa ubuhlungu njengo mmeli wephalamende, abantu bedubeka kubuya imthetho ezakwenza abantu be Zimbabwe bezwe ubuhlungu”
Ingcitshi kwezomthetho uMnu Peter Sibindi uthi lumthetho uphambana lokumunyethwe yisisekelo sombuso.
“Imthetho efana lalu mthetho yenza uzulu ahlalele evalweni esesaba ukuba nxa engakhuluma ulakho ukubotshwa. Kayihambelani lesisekelo sombuso”
Kodwa ilunga le ZANU PF engunobhala wohlangothi lwabontanga, uMnu Admire Masikati uthi lumthetho uzakwenza abantu bahloniphe ilizwe labo elitshona lihlambazwa.
“Kungumthetho omuhle kakhulu. Abantu abanengi abalathando ngelizwe labo. Ubuye ngesikhathi esihle ngoba uzakwenza abantu bathande ilizwe labo”
I Studio 7 kayenelisanga ukuzwa imibono kampathintambo wezemithetho umnumzana Ziyambi Ziyambi. Kodwa ekhuluma ngemva kokupasiswa kwalumthetho edale leSenate, wathi lumthetho uqahakathekile lwezomvikela welizwe. Esithi kawuqophanga muntu ikakhulu labo abayabe bezivakatshela phandle kwelizwe ukuyabona izihlobo labangane kodwa uqondiswe kulabo abaya kwamanye amazwe ngenjongo yokuyacela ukuthi ilizwe lijeziswe kwezomnotho kumbe lithwaliswe nzima ngezinye indlela.
Abatholakala belecala phansi kwalumthetho babikwa belakho ukugwetshelwa ugodo kumbe ukuhlala ejele okwesikhathi eside.
Umthetho lo uza ngesikhathi sokungase nsuku zatshwala ukuthi kuqhutshwe ukhetho lokudinga amakhansila, amalunga edale lephalamende lomongameli welizwe, ngenyanga ezayo kaNcwabakazi. Kungalesi sizatho ingcwethi ezicubungula ezombusazwe zisithi ulakho ukusetshenziswa ukwethusela abamabandla aphikisayo.
Forum