BULAWAYO -- Abamabandla ezombusazwe elizweni jikelele bayawusola okwamagama umkhuba osubhahile wokudatshulwa kwamabhakane aveza imifanekiso yalabo abakhankasela usekelo lokuvotelwa kukhetho oluzayo bekhuthaza ukuqhutshwa kokhetho olukhululekileyo olulokuthula, lukamhlaka 23 Ncwabakazi 2023.
Lumkhuba usolwa njalo ngabenhlanganiso ezizimeleyo ezilwela ilungelo loluntu okugoqela lekomishini eyeZimbabwe Human Rights Commission, besithi lokhu kulakho ukudala isimo sokuthi ukhetho lwalonyaka lucine lusiba ngolungakhululekanga.
UMqondisi weZHRC eNkabazwe, koBulawayo, eMatabeleland North leMatabeleland South, uDokotela Sindiso Nkomo uthi kulicala ukudatshulwa kwamaposter.
"Ngaphansi komthetho weElectoral Act kulicala ukudatshulwa kwamaposters abaphatheka kukhetho njalo ukunamathisela iposter phezu kweyomunye lakho kulicala sikhuthaza abamabandla ukuba bayemangala eZimbabwe Electoral Commission ngezehlakalo ezinjalo kuthi engabonakala okwenzayo abotshwe ngoba iZEC iyakukhangela lokhu ngaphansi kwekhomithi yamabandla ebona ngezokhetho."."
UNkosikazi Kurai Makumbe isiphathamandla eseZHRC uchasisa ngamacala aselethwe kibo okwephulwa kwamalungelo oluntu.
"Lonyaka iZHRC isiyamukele amacala okwephulwa kwamalungelo oluntu 438 kuthi angu61 ngawodlakela okunye ngawokubandlululwa ekuphiweni inhlanyelo."
Obona ngokuqhutshwa kwenhlelo kubandla leZAPU uMnu Ndodana Moyo ngomunye wabasola lumkhuba.
"Yisehlakalo esibi sokudelela lokungahloniphi idemocracy, kwenziwa yilabo ababona ingathi sebelamatittle deeds okubusa abakwenzayo ababotshwe ngoba lokhu kutshengisaukungabilokuthula thina njengeZAPU sithi akuqhutshwe ukhetho ngokuthula."
Isikhulumi seCitizens Coalition for Change, koBulawayo, uMnu Swithern Chirowodza ucala ibandla elibusayo ngokudatshulwa kwamaposter amabandla aphikisayo.
"Ukudatshulwa kwamaposter ngamalunga eZANU-PF kuphehla udlakela esilubona empumalanga sikhuthaza abalandeli bethi ukuba bengabanjwa yiwuka njengenhlanzi baphole babambe ukuthula."
Ilunga leZanu- PF ongumqondisi wenhlanganiso ezithi izimele yodwa eyeForever Associates Zimbabwe –FAZ, uMnu Kudakwashe Munsaka ukuthaza abantu ukuba behlukane lokudabula amaposters abanye.
"Kuyadanisa ukuba ngizwe ukukhitshwa kwamaposters amanye amacandidates njalo asikhuthazi ngoba adindiswa ngemali akulunganga sibili kubi uma sikhangela idemocracy lokhu kwaqala ngesikhathi sama By-Election njalo samangala emapholiseli kuyazakala amabandla aphikisayo yibo ababekwenza lokho. Uma koBulawayo bekhupha amaposter yinto embi ngoba sekubamba amabandla wonke asiyikhangeleli ukuthi iqhubeke isiyaphambili adindwa ngemali abasakhulayo abayeke ukudabula sikhuthaza abakoBulawayo ukuthi bengakwenzi lokhu labakubandla elibusayo abantu bakhankase bethule sekungumkhuba webandla elibusayo leliphikisayo."
Izehlakalo zobudlwangudlwangu lodlakela lokulwisana kwezombusazwe ngaphamibilini kokhetho, olwenziwa ngenyanga ezayo kaNcwabakazi lokhu zisanda.
KoBulawayo esigabeni sePelandaba-Tshabalala ilunga leCCC, uMnu. uOstallos Siziba amaposter akhe omkhankaso adatshulwe amanye efakelwa edwetshwa lokucitshwa.
Ilunga leCCC, eliding ukumela iGutu Central, uMathew Takaona laye ulodubo olufanayo. UMnu Collen Maboke obhalise ukuncintisa ezimele, eMasvingo laye ukhala ngokuthi amaposters akhe ayadatshulwa, abanye besithi angabe edatshulelwa ngabeCCC ngoba ekhethe ukuncintisa ezimele.
Kumikhankaso yakhe yonke uMongameli Emmerson Mnangagwa weZanu-PF, ukhuthaza uzulu ukuba engaphatheki kudlakela. Ekhuluma emngcwabeni kamuyi uNkosikazi Zodwa Dabengwa umkhokheli webandla leCitizens Coalition for Change uMnu Nelson Chamisa laye ukhuthaze ukukhankasa okukhululekileyo ezweni njalo NgeSonto ukhangelelwe ukuba lomhlangano omkhulu, oweRally, enkundleni yeMkoba eGweru.
Forum