WASHINGTON - Uphenyo olwenziwe yinhlanganiso ye-Elite Africa Research ngoNhlangula luveza ukuba ibandla leCitizens Coalition for Change, elikhokhelwa nguMnu. Nelson Chamisa, lilakho ukunqoba kukhetho lukamongameli oluzaqhutshwa mhlaka 23 Ncwabakazi lonyaka.
Iphephandaba leDaily Maverick libika ukuba uphenyo lolu luveze ukuba ibandla leCCC lizathola amavoti ayisilinganiso esifika phose okungamatshumi amahlanu ekhulwini – 47.6 percent kuthi eleZanu PF lithole afika phose amatshumi amane ekhulwini – 38.7%.
Uphenyo lolu luveze njalo ukuba ibandla leCCC lizanqoba kukhetho lokudinga amalunga edale lephalamande phose ngesilinganiso esifanayo.
Inhlanganiso yeAfrobarometer isanda kwenza uphenyo oluveze ukuba ibandla leZanu PF lilakho ukunqoba kukhetho oluzayo.
UMnu. Felix Magalela Sibanda, umsekeli wesikhulumeli sebandla leCCC, uthi abantu abanengi bafuna ukuvotela uChamisa lebandla lakhe hatshi uMongameli Emmerson Mnangagwa lebandla leZanu PF abathi bamotsha umnotho welizwe.
UMnu. Joseph Tshuma, okudale leCentral Committee kubandla leZanu PF, uthi kwesinye isikhathi kaziqedakali inhlanganiso ezenze uphenyo lwezombusazwe.
Forum