BULAWAYO - IZimbabwe Human Rights Commission ikhuthaza abantu ukuba behlukane lodlakela sikhathi sonke, ikakhulu kulungiselelwa ukhetho olukhulu oluzaqhutshwa ngoNcwabakazi lonyaka.
Lokhu kwethulwe emhlanganweni owenziwe koBulawayo ngoLwesibili obekulenhlanganiso ezitshiyeneyo.
Umsekeli kamgcinisihlalo weZHRC, uDorothy Moyo, ukhuthaze ukuba kuqhutshwa ukhetho olulokuthula eZimbabwe lonyaka.
"Umhlangano esiwuqhube lamhlanje sijonge ukuba kubelokuthula ezweni njalo zinengi inhlelo esiziqhubayo ezweni."
UNkosikazi Kurai Makumbe, umqondisi wezikhubeko eZHRC, uthi kulamacala asebewahlolisisa kulandela ukuqhamuka kobudlwangudlwangu kwezinye indawo eZimbabwe.
"Lonyaka iZHRC isiyamukele amacala okwephulwa kwamalungelo oluntu 438 kuthi angu61 ngawodlakela okunye ngawokubandlululwa ekuphiweni inhlanyelo."
UNkosikazi Pretty Gwadzikwa, umsekeli wezokhetho eZimbabwe Electoral Commission koBulawayo, uthi sebelengwalo zokufundisa ngokhetho ezeBraiile.
"Lonyaka senelise ukudindisa ingwalo eziphathelene lemfundiso yokhetho ibraille eziphiwa abantu abangaboniyo kodwa besenelisa ukubala ibraille angikabi lolwazi lokuthi iphepha lokuvota lizadindiswa ibraille."
UNkosikazi Helen Ziriva, ilunga leCitizens Coalition for Change, ucome umhlangano walamuhla.
"Umhlangano uhambe kuhle kodwa udubo esihlangana lalo ngolokuthi okukhulunywa lapha emhlabganweni kuhlukile lokwenzakala phandle kuzulu."
Ilunga lePolitburo kuZanu- PF, uMnu. Elifasi Mashaba, uthi ujabulele uhlelo olweBraille.
"Umhlangano walamuhla uqakathekile kithi thina amabandla ezombusazwe njalo uhlelo lwebraille luqakathekile ngoba njengelizwe sisemuva yikwephula amalungelo abanye."
EleZimbabwe lizaqhuba ukhetho olukhulu lonyaka mhlaka 23 Ncwabakazi.
Forum