Abatsha bacatshangelwa ukuba yibo abamemethekisa udlakela lwezombusazwe eZimbabwe ngesikhathi kulungiselelwa ukhetho olukhulu oluzakwenziwa lonyaka ngoNcwabakazi.
Sekuqhamuke udlakela endaweni ezibalisa eMasvingo, Hurungwe, Chiredzi lezinye lapho abacatshangelwa ukuba ngamalunga ebandla leZanu PF abakhahlameze abakubandla leCitizens Coalition for Change, elikhokhelwa nguMnu. Nelson Chamisa.
AbeCCC bavinjwe ngabakubandla elibusayo lamapholisa bezama ukukhankasele ukhetho oluzaqhutshwa mhlaka 23 Ncwabakazi lonyaka. Amanye amalunga ebandla leli atshaywe ngesikhathi beqoqa kumbe besemihlanganweni yabo lozulu.
Kulabathi ubudlwangudlwangu lobu bumemethekiswa ngabatsha kubelabanye njalo abathi konke lokhu kwenziwa yilabo abakubandla leZanu PF kuphela.
Okhokhela uhlangothi lwabatsha kubandla leMthwakazi Republic Party, uMudenda Chilumbo, uthi ibandla elibusayo yilo elibangela udlame.
“Ayisikho kwakuqala ukubona udlakela ngesikhathi sokhetho. Vele iZanu PF yiyo indlela yayo, lobukhokheli bayo. Kubanzima ukuthi siqede loludlame nxa abakhokheli beyibo abaluthandayo.”
Okuhlangothi lwabatsha kubandla leCCC, uSenzeni Maphosa, laye uthi ibandla leZanu PF yilo elitshotshozela udlakela.
“Abatsha sebephatheka kudlame ngendlela yokuqhatshwa ngabadala kwezombusazwe abaqakathekisa ukunanzelela bona lemuli zabo, ngaphandle kwabababusayo. Lokhu sokusenza besebenzise iViolence ukubamba ngamandla abavoti, ukuze bebabisele ezikhundleni ngenkani, lanxa bengancedisi izigaba. Abasakhulayo baphatha udlame besebebhadalwa ngemiganu yezitshwala lezidakamizwa, okwenza bakhohlwe inhlupho abaphakathi kwazo.”
Kodwa isikhulumeli sohlangothi lwabatsha kubandla leZanu PF koBulawayo, uAddington Mpofu, uyakulandula ukuthi kulodlakela elizweni, kanye lokuthi lubangelwa libandla lakhe.
“Elizweni lonke jikelele, akula hlupho lodlame. Kodwa udubo yikuthi kulabantu abafuna ukwenza kukhanye njengokuthi kulokuhlukunyezwa kweleZimbabwe, ngoba sebephelelwe ngumphako wamacebo. Angeke sathi udlame ludubo olungathiwa lwenza izizalwane zelizwe lethu ziswele ubuthongo.”
UNkosazana Barbara Bhebhe, okhokhela inhlanganiso ebona ngezokhetho, eyeElection Resource Centre, uthi ukuze ukuphatheka kwabasakhulayo endabeni zodlakela kuphele, kudingakala ukuthi ontanga laba betholiswe imisebenzi.
“Kufuneka imizamo yokuthi abatsha laba benelise ukuzimela bodwa, bangafiki ezigabeni zokuthi bayabe bengela lutho, okwenza besetshenziswe ngabezombusazwe, benikwa okuyizimali okungatsholutho. Kufunakala njalo ukuthi ontanga laba batholiswe izimali zokusungula amabhizimusi abo, kanye lokuthi uhulumende avule amathuba okuqhatshwa kwabo.”
Ingcwethi ecubungula ezombusazwe, uMnumzana Rejoice Ngwenya, uthi abamabandla ezombusazwe lawo alawo umlandu wokumisa udlame osoluqhamuke endaweni ezimbalwa eZimbabwe.
“Ayisikho’nto engalungiseka ngesiphangiphangi, ngoba nxa bengela misebenzi lezinto zokwenza, bazalokhu benikwa izimali lotshwala yiZanu, bengena emigwaqweni besenza udlame. Bona omongameli abamaqembu ancintisayo, kukibo ukuthi bakhulume labantu babo ukuthi udlame ayisikho ndlela yokuhuga amaVotes.”
Kwake kwaqhamuka udlakela lwezombusazwe kusukela ilizwe lisanda kuthola uzibuse langesikhathi umuyi uMorgan Tsvangirai ephume kukhetho lukamongameli olwaluphindwa ngomnyaka ka2008.
Forum