HARARE - Uphenyo olusanda kwenziwa yinhlanganiso yeAfrobarometer eZimbabwe luveza ukuba ibandla leZanu PF linganqoba kukhetho lukamongameli. Luveza njalo ukuba abantu abanengi eZimbabwe bakhonona ngesimo esibi somnotho welizwe.
Uphenyo lweAfrobarometer lolu, olwenziwe yinhlanganiso yeInstitute of Mass Public Opinion eZimbabwe, luveze ukuba abantu abayisilinganiso sokungamatshumi amathathu lanhlanu ekhulwini – 35% bengavotela ibandla leZanu PF kukhetho lukamongameli kuthi abafika phose okungamatshumi amathathu ekhulwini – 27% eleCitizens Coalition for Change.
Kulempumela phose efanayo yokhetho lokudinga amalunga edale lephalamende. Kuphenyo lolu, abantu abafika okuyisilinganiso sokungamatshumi ababili lasikhombisa ekhulwini – 27 percent kabavezanga ukuba bazavotela ibandla liphi kukhetho lukamongameli lolokudinga amalunga edale lephalamende. Omunye walabo abenze uphenyo lolu, uNkosikazi Simangele Nyede, uchasisa ngalokho abakutholileyo.
UMnu. Mabutho Moyo, owebandla leZANU PF, uthi uphenyo lweAfrobarometer luyitshaye ekhaleni.
UMnu. Gift Ostallos Siziba, umsekeli wesikhulumeli sebandla leCCC, uthi ibandla lakhe lizasebenzisa uphenyo lolu ngesikhathi likhankasela ukhetho oluzaqhutshwa mhlaka 23 Ncwabakazi lonyaka.
UMnu. Witness Dube, obona ngokwethulwa kwemibiko kubandla leZanu PF, uthi bayayihlonipha impumela yophenyo lolu.
Ingcwethi kwezombusazwe, uMnu. Bekezela Gumbo, okunhlanganiso yeZimbabwe Democracy Institute, uthi uphenyo lolu lutshengisa ukuba akukaveli kahle ozanqoba kukhetho olukhulu oluzayo.
Okunye njalo okuphume kuphenyo lolu yikuthi abantu abayisikhombisa phakathi kwabalitshumi bathi bazavota kukhetho olukhulu oluzayo. Abafika isilinganiso sokungamatshumi ayisitshiyangalombili lanhlanu ekhulwini – 85% bathi uhulumende kaMongameli Emmerson Mnangagwa uyazehlulekela kwezomnotho.
Forum