WASHINGTON - Umthethwandaba uthi bekumele ibandla leCitizens Coalition for Change (CCC) linike amapholisa insuku ezinhlanu zokuthi liqhube ngeSonto umhlangano omkhulu wokusungula uhlelo lokukhankasela ukhetho olukhulu oluzayo.
Umantshi uMary Msipha ulahle udaba lolu eBindura magistrates’ courts, olupanyekwe libandla leCCC ebelikhonona ngesinqumo sakhe asenze ngoLwesihlanu esokuthi kumele kuthoniswe udaba lolu ngoLwesibili hatshi ngesiphangiphangi ngeviki ephelileyo.
Isinqumo sika mantshi uMsipha sichothozwe ngoLwesihlanu nguJustice Tawanda Chitapi edale leHigh Court othe wenze okungekho emthethweni ngakho-ke kumele aphume lesinqumo esikhanyayo ngeSonto.
Bekumele ibandla leCCC lenze umhlangano walo eBrockdale Pfugari Open Space eBindura lapho amapholisa athe akulazambuzi, amanzi lemigwaqo.
Ingwetha leCCC, uMnu. Agency Gumbo, uthi umantshi uMsipha wethule isinqumo ngeSonto esingalandeli ezinye iziqa zomthetho weMaintenance of Peace and Order Act. Uthi kukhangelelwe ukuba bazaphikisana laso eHigh Court.
UNkosazana Nonhlanhla Mlotshwa, okubandla leCCC, uthi amalunga ebandla leli avela eMatabeleland South lezinye izabelo aphenduke endleleni esethole umbiko othi kawusoze uphumelele umhlangano wabo omkhulu eBindura.
UMnu. Believe Gaule, ilunga lebandla leZanu PF, uthi abakubandla leCCC bakhala okungapheliyo.
Forum