WASHINGTON DC – UMongameli Emmerson Mnangagwa, ongumkhokheli njalo weZanu PF, uthi akula dlakela olutshona lubatshazwa ngabamabandla aphikisayo eZimbabwe phambilini kokhetho oluzakwenziwa mhlaka 23 kuNcwabakazi.
Ekhuluma emhlanganweni wokukhankasela lolukhetho awenzelwe enkundleni yeChemhanza, eMagunje, ngoMgqaibelo uMnangagwa ukhuthaze abantu ukuthi baqhubeke behlalisane kuhle futhi bavote ngokuthula kungela kutshayana.
Kodwa umsekeli wesikhulumeli sebandla eliphikisayo eleCitizen Coalition for Change (CCC), uMnu Ostalos Siziba uthi uMongameli akakhulumi iqiniso ngoba sokuqalile udlakela elizweni njalo elakhe ibandla kayisilo eliqala udlakela ngoba amalunga alo yiwo ahlala ehlaselwa mihla ngemihla ikakhulu emaphandleni.
Kulamalunga aweCCC atshaywe izolo emhlanganweni obukhokhela nguMnu. Nelson Chamisa koGutu, esabelweni seMasvingo. Ngeviki edluleyo kutshaywe amanye amalunga aleli bandla eMagunje, esabelweni seMashonaland West, eManicaland leMasvingo.
Lanxa ibandla leZanu PF, liqhubekela phambili ngemihlangano yalo yokukhankasela usekelo kukhetho lwenyanga ezayo, ibandla eliphikisayo eleCCC, lokhu libhekane lenkinga ekuqhubeni limihlangano, ezigoqela ukwaliswa ngamapholisa ukuyenza kwezinye indawo kumbe ukutshaywa lokuhlukuluzwa kwamalunga ayabe enelise ukubuthana.
Kunje iCCC, ize isiye emthethwandaba ikhweza udaba lwayo lokwaliswa ukuqhuba umhlangano wabo eBindura ngeSonto.
Forum