VICTORIA FALLS - Izakhamizi zemangweni weVictoria Falls, emaphandleni lasedolobheni zithi kumele uhulumende abone ukuthi zithola isilinganiso esithile senzuzo etholakala emsebenzini wokwethekelelwa kwelizwe ikakhulu lapho abantu bezobuka ubuhle bempophoma zamanzi.
Izakhamizi lezi zithi inzuzo etholakala emsebenzini wokwethekelelwa kweVictoria Falls ihanjiswa yonke esikhwameni sikahulumende ingasaphendukiswa ukuzosebenza ukuthuthukisa idolobho leli loba emaphandleni aligombolozeleyo.
Isilinganiso samatshumi amathathu ekhulwini -30%, senzuzo etholakala ukubukisa impompoma zamanzi kumfula weZambezi kanye lezinye indawo ezigcinwa inyamazana zendle ezinjenge Hwange leZambezi National Park, singaphathisa kakhulu kunhlelo zentuthuko kulumango.
UKhansila Givemeagain Moyo weKachechethe emaphandleni, uthi kuyadanisa ukuthi indawo le kayilantuthuko.
“Ungakhangela abantwana abanengi lapha labazali wona amafalls abawazi. Esilakho esikuzuzayo yikudlelwa izifuyo, yikubulawelwa izilimo zethu yizo indlovu, izilwane, impisi lamahlosi, kodwa ukuthi thina singabe sizuza loba yini akukho ngitsho, ngiyafunga. Yizo izinto okufanele ihulumende izikulungisise ukuthi esinye lesinye isigaba kasizuze lapho esikhona.”
Amazwi kaMoyo agcizelelwe nguMnumzana Nkosinathi Jiyane onguAlderman waleli dolobho ngokuthi uMongameli Emmerson Mnangagwa ngabe uyezwa isicelo sabo lesi esesileminyaka leminyaka.
“Umongameli kalalele athi abantwabami bayakhala njenganxa kusenzeka kwezinye indawo kumbe kuseMarange ukuthi inzalo yaleyondawo kufuze ithole. Eqinisweni, sicina lindawo yeZambezi falls yayithola US$ 7 000 ngelanga ngakho sithi sicela ukuhletshunelwa ukuthuthukisa abantu beVictoria Falls.”
Uphenyo olwenziwe ngabohlangothi olubona ngokwethekelelwa kwelizwe olwe Zimbabwe Tourism Authority (ZTA) nyakenye, luveze ukuba ngomnyaka ka 2021 ngemva kobhubhane lwe Covid-19, izethekeli ezangenayo zaba zinkulungwane phose ezingamakhulu amane-397732. Kodwa uNkosikazi Regina Khumalo oyakhele ngaphansi kwenduna uMvuthu uthi lelinani alihambelani lesimo sobuyanga obukule indawo.
“Kuyaswelakala amaphilisi ezibhedlela, uhambe esibhedlela ugula bafike bekunika icard kuphela uziphendukele ubuye ekhaya, kumbe uphiwe ama paracetamol amabili ugula.
Silama resources, silenkalakatha yomfula uZambezi, izivakatshi siyavakatsha zizobona umfula zibhadlale izimali,silezinyamazana imali yazo emele incedise umphakathi iyathathwa ihanjiswe eHarare itshiyabanikazi lapha bedubeka.”
UNkosikazi Sifiso Sibanda omele inhlanganiso yezakhamizi, eye Hwange Residents Association uthi phezu kokuthola isilinganiso esithile senzuzo, bona bafisa ukuba abantu asebeluphele labafundi bavunyelwe ukuzobuka lezi ndawo kungela mbhadalo.
“Kuyasweleka ukuthi kutholakale indlela zokukhangelisisa lokhu. Bonaba abantwana bezikolo zonke la bengaphiwa amathuba okuthi bahambe bayebona amafalls ngoba bayafuna ukuthi bayafika kodwa imali inzima njalo kayikho, njalo labasimeleyo ngezombusazwe ngoba bona balayo imali babona angani wonke umuntu ulayo bengakuqakathekisi lokhu.”
UMnumzana Richard Moyo umphathintambo kahulumende esabelweni seMatabeleland North, uthi izikhalazo lezi uhulumende uphezu kwazo, njalo linzuzo iphiwa amakhansili ukuthuthukisa izakhiwo zakulindawo.
“Yikho uhulumende waphuma lesikhwama sedevolution funds. Imali ze devolution yi five percent yemali engena ku national yikho uyabeseyiphendukisa kuma councils kubalela iVictoria Falls. Ilamama projects amanengi esiwayenzile ngemali ze devolution, zimali zonezo zama Game Park, lokungena kumafalls.”
AbeZimbabwe National Parks and Wildlife Authority lonyaka bakhweze inhlawulo yokungena ukuzobuka impophoma zeFolosi. Izethekeli eziyizalwane ze Zimbabwe zihlawula amadola alitshumi eMelika-US$10, umuntu ngamunye, abadabuka emanzweni angomakhelwane, aweSADC bakhokha amatshumi amathathu-US$30, kuthi izethekeli zamazwe akhatshana zikhokhe amatshumi amahlanu eMelika -US$50.
Ngaphandle kokubukiswa kwempompoma zamanzi, izakhamizi zalumango zithi kunengi okwenziwa kulindawo okubuthanisa imali, okugoqela ukugwedla ngesikepe lokundiza, ibanjee jumping, ukubuka izinyamazana zendle, ezinye zezethekeli zihlawuliswa ukuzozingela lokunye okunengi nengi.
Ngomnyaka odluleyo, abe ZTA bathi bathole inzuzo engaba yizigidi phose ezingamakhulu ayisithupha zamadollar eMelika - US$580 million.
Bahlose ukwengeza linzuzo ukuze ifike kumabillion amahlanu amadola eMelika-US$5 billion kusiya fika umnyaka ka 2025, ngemva kokusungulwa kohlelo lwe National Development Strategy oluhlose ukuthuthukisa ukubukiswa kwendawo ezithakazalelwa ngabantu baselizweni labavela kwamanye amazwe.
Forum