WASHINGTON - Inhlanganiso ezizimeleyo eyeThe Sentry leye Open Secrets zibika ukuba uMnu. Kudakwashe Tagwirei, umcebisi kaMongameli Emmerson Mnangagwa, ucatshangelwa ukuba wasebenzisa indlela ezingaqondanga ekuthengeni inkampani yeBindura Nickel leye Freda Rebecca Gold Mine kulandela ukuthola kwakhe imali eReserve Bank of Zimbabwe.
Inhlanganiso lezi zithi uTagwirei ucatshangelwa ukuba wasebenzisa iSotic Investments yakwele Mauritius ekuthengeni imigodi le, eyayingeye ASA Resource Group, ngemali ebiza izigidi phose ezingamatshumi amathathu zamadollar eMelika – US$29.5 million.
Inkampani le kubikwa ukuba yayingasasebenzi ngemfanelo ngesikhathi uTagwirei esenza lokhu. Yayiphethwe yi-Duff And Phelps, eyaziwa okwamanje ngokuthi yi-Kroll.
UTagwirei kuthiwa wasebenzisa lamankampani akwele South Africa, eCayman Islands lamanye kwele Bhilithane ekuthumezeni imali ayithola ebhanga leReserve Bank of Zimbabwe.
Kuthiwa bonke ababethwala imali le ngendlela ezitshiyeneyo beyisa kwele Bhilithane babekwazi ukuba ngeka Tagwirei, owayefuna ukuthenga imigodi le ekwele Zimbabwe.
I-The Sentry lenhlanganiso ye-Open Secrets zibika ukuba kwalungiswa amaphepha okuthumeza imali le ngendlela ezingaqondanga.
Kasenelisanga ukukhuluma ngodaba lolu loTagwirei, obengaphenduli umakhalekhukhwini. UMnu. Rejoice Ngwenya, ingcwethi kwezenotho okunkampani yeCommon Market for Liberal Solutions, uthi akwethusi okwenziwe nguTagwirei, owafakelwa izijeziso zenotho ngele Melika elamethesa umlandu wobukhohlakali.
Forum