GABORONE -- Amapholisa akweleBotswana ahlaba omkhulu umkhosi ngokubulawa mahlayana kwabantu elizweni. Ezinye izizalwane zeZimbabwe ziphakathi kwalabo abalahlekelwe yimphefumulo, kukanti abanye ngabadala amacala.
Isikhulumi samapholisa akweleBotswana, uNkosikazi Selina Omphile uthi bakhathazekile ngokuqonga kwenani labantu ababulawa mahlayana.
Lokhe kusungule umnyaka, sekubulewe abantu abangaba likhulu lamatshumi amane lanthatu (143), okutsho ukuthi kubulawa phose umuntu oyedwa ngelanga.
Lokhu sekutshiye amapholisa ethithibele esithi kakwazi ukuthi abantu sebengenwe yini elizweni elaziwa ngokuthi lilokuthula.
AbeZimbabwe labo baphakathi kwalabo abalahlekelwa yimphefumulo, kugoqelwa omunye owabulawa kabuhlungu ejele kanye lomunye osanda kudutshulwa ngempelaviki.
Ngempelaviki kubotshwe njalo omunye oweZimbabwe edolobheni lePalapye kulandela ukuthi ayetheswe icala lokugwaza abulale isizalwane seBotswana.
Amapholisa athi kuzehlakalo zempelaviki kubulewe abantu abane, okugoqela umtshayeli weloli odabuka eZimbabwe, yena odutshulwe yizikliwi ngesikhathi zimthathela imali leyinye imphahla.
Elandisa ngesehlakalo lesi, ommele amapholisa umnunzana Kgotlaetsile Oodira uthi oweZimbabwe kade esendleleni etshayela esiya eTanzania.
“Kusehlakalo lesi, kube khona olahlekelwe yimpilo, engumtshayeli we loli. Akade elaye ulimele, abakade bebahlasele bebesebenzisa umbhobho. Olahlekwele yimpilo, ngodabuka eZimbabwe.”
Omunye osebenza njengomtshayeli wamaloli, umnunzana Ntokozo Thebe uthi kuyabethusa.
“Asisa vikelekelanga ukuthi siphumule. Kufuna ukuthi lapho ophumula khona kube lenkamba yamapholisa njalo akubi lula ukuthi uphumule lapho okulamapholisa khona.”
Uthi okwenza kube nzima yikuthi abagangileyo bayakwazi ukuthi abatshayeli bama loli bathwele imali, kodwa ukuthi kufike ekubulaweni umuntu sekuza kwenza bayesabe.
“Bayakwazi ukuthi abatshayeli bathwele imali ezinengi, ngakho nxa bekubambile kukhona abangakuthola. Kodwa ukuthi kuzekufike esigabeni sokubulala umuntu sekuzasiqhuqhisa ikakhulu eBotswana lapho ekade sizizwa sikhululekile
Isizalwane seZimbabwe esihlala eGaborone, umnunzana Dumezweni Ncube uthi ukubulawa mahlayana kwabantu kukhomba ukuthi kulodubo emphakathini okumele lulungisiswe.
“Sekusethusa indlela esizwa ukuthi kulamacala okubulawa kwabantu mahlayana kweleBotswana. IBotswana iyaziwa njenge lizwe elilokuthula but ukuthi kuthiwe sekubulewe abantu abangu 143kunyanga eziyisithupha kuphela kuyethusa. Kukhomba ukuthi kukhona uhlupho okumele lulungisiswe.”
Amacala amanengi okubalala ayenzeka ngesikhathi sengxabano ikakhulu kwabathandanayo, ukulwa emabhawa kanye lokuthatha imphefumulo ngesikhathi izikliwi zingene ezindlini.
Amapholisa athi asenanzelele ukuthi amacala okubulala amanengi adalwa yikwehluleka ukuzwisisana ngesikhathi kuloku phikisana.
Baxhwayise uzulu ukuthi engahambi ethwele izikhali eziyingozi ezifana lengqamu, njalo abantu bazijayeze umkhuba wokuphuma kumpikiswano engacina idala ukulahleka komphefumulo.
Forum