GABORONE - Inkokheli yebutho lakwele Zimbabwe lisemhlanganweni kwele Botswana oqoqwe yinhlanganiso yamasotsha angaphansi kwamazwe eye U.S Africa Command ukuhlaziywa ukuthi ukuntshintsha komumo womkhathi kubangela kanjani ukungahlaliseki kweleAfrica.
EleZimbabwe libambane lamanye amazwe angamatshumi amathathu lasikhombisa - 37 ukuzaxoxisana phezu kwesimo sokuntshintsha komkhathi lokuthu ihlukumeza njani isimo sokungahlaliseki eAfrica. Kodwa eleSouth Africa kalizihluphanga ngokungenela lomhlangano oyenzelwa eGaborone, noma nje isikhulumi senhlanganiso yeU.S. AFRICOM, uMnunzana Ali Philiphs, esithi ilizwe leli belinxusiwe.
“EleSouth Africa lali nxusiwe njalo lizaqhubeka linxuswa ngoba siyahlonipha ubudlelwano esilabo ikakhulu kwezokuntshintsha komkhathi, okungalimazi izwekazi leAfrica kuphela kodwa umhlaba wonke njikele.”
Kulokungezwani phakathi kwele South Africa kanye lele Melika kulandela imbiko enyangeni edluleyo ukuthi eleSouth Africa lanikeza eleRussia izikhali zokulwisana lele Ukraine. EleRussia alidlelani kahle leleMelika ngemva kokuba lihlasele ilizwe leUkraine ngoNhlolanja nyanyeke, impi elokhe isaqhubeka.
Isikhulumi sikamphathintambo wezomvikela kwele South Africa, uMnunzana Cornelius Monama, uthi ugatsha lwakhe alwazi lutho ngokuthi ilizwe lakhe kalingenelanga umhlangano weU.S. Africom.
OweZimbabwe ocubungula ngezombusazwe, uMnunzana Zenzo Moyo, uthi kumngceke ukuthi ukungabikhona kwele South Africa kulomhlangano kuhambelana lezehlakalo ezisanda kwenzeka phezu kodaba lwezikhali leRussia.
“Kungabe kulobudlelwano phakathi kukungahambi kweleSouth Africa kumhlangano weAFRICOM kulandela indaba zezikhali zempi okuthiwa zathengiselwa iRussia. Ubudlelwano phakathi kwamazwe womabili abubuhle ngakho lokhu okwenzakalayo akumangalisi.”
Kusenjalo, umhlangano osungulwe eGaborone ngoMvulo ufake isiqiniseko sokuthi kumele ibutho emazweni aweAfrica atshiyeno, lincedise ukulwisana lokungahlaliseki, okugoqela ukulwa kanye lokuswelakala kokudla, okungabangelwa yikuguquka kwesimo somkhathi.
Umqondisi weU.S. Africom, uMnunzana Kenneth Ekman, uthi kumele kuphendulwe imbuzo phezu kodaba lokuntshintsha komkhathi kanye lokuxokozela okuhambelana lakho, ikakhulu ukulwa kanye lezinye ingxabano kweleAfrica.
“Ukuguquka komkhathi sekudale ukuthi indubo akade sivele silazo ziyephambili, ikakhulu ukungezwani kanye lengxabano.”
UNkosazana Tegan Blaine, umqondisi kugatsha lwe Melika olubona ngokuzama ukuqinisa ukuthula eleU.S Institute of Peace, uthi ingxabano phakathi kwamazwe atshiyeneyo, ikakhulu kuzwekazi leAfrica, isiqongile ngenxa yokuguquka kwesimo somkhathi.
“Indaba zokuthi amazwe engahlalisani kuhle sezoqongile ngenxa yokuguquka kwesimo somkhathi. Lokhu kubangwa yikulwa phezu kokusilela kokudla, amanzi kanye lokubangisana ezemvelo.”
Umhlangano oseGaborone uzagqitshwa ngoLwesihlanu njalo kukhangelelwe ukuthi kuphunywe leziqondiso ezizayizikhonkwane zokuliswana lokukuguquka komkhathi.
Abebutho abalezikhundla eziphezulu emazweni atshiyeneyo kwele Africa, yibo abangenele lomhlangano kuyinhloso yokuthi izinqumo ezizathathwa eGaborone, ziyenziwe ngokuphazima kweso.
Izwekazi leAfrica, kutsho inhlanganiso yeU.S Institute of Peace, yilo elihamba phambili ngengxabano ezikhona zidalwa yikuguquka kwesimo somkhathi.
Inhlanganiso ye U.S. Africom yabunjwa ngomnyaka ka 2007 ngenhloso yokuthi kube lubedlelwano phakathi kweleMelika lebutho lamazwe wonk ease Africa ekulwiseni inking ezitshiyeneyo.
Forum