VICTORIA FALLS - Inkokheli zenhlangothi zikahulumende kuzwekazi le Africa sezitshiyelwe ingqobe yokuthuthukisa isiphatho sezisebenzi ngokuzipha iholo elenelayo ukuthi zinakekele imuli kanye lokuvula amathuba emisebenzi lapho kunanzelelwa ukuba inani lenzalo enengi isebuyangeni.
Linkuthazo yethulwe ngumqondisi wekomishini yomanyano wamazwe awezwekazi labensundu, eye African Union Commision, uAmbasador Fathallah Sijilmassi emhlanganweni oqhutshelwa, eVictoria Falls, ngosuku lokunanza ukuqakathekiswa kwezisebenzi zabohulumende ele African Public Service Day.
USijilmassi uthi amazwe aleli zwekazi kumele asebenzelane ukuze benelise ukufeza izinqumo lezivumelano abazilobelanayo zentuthuko ezigoqela ukudlelana okuhle phakathi kwazo kungelamigoqo.
“Sisonke singakha amazwe ethu ngendlela elezinga eliphezulu ukuze sifeze isifiso zethu zesivumelwano kusiyabamba umnyaka ka 2063 sigcwalisa lezifiso zikazulu.”
Evula lumhlangano, umphathintambo wezisebenzi len hlalakahle kazulu, uMnumzana Paul Mavima uthe kuyadanisa ukuthi isilinganiso esikhulu sabantu baseAfrica siphila ebuyangeni obesabekayo. Kunje uthi kulezigidi eziphezu kwamatshumi amahlanu-54.5 million abangenelisi ukufinyelela imfundo lula lamathuba emisebenzi encipha njalo nje okuyikho osedala ubusela lenkohlakalo kungatsha zikahulumende.
“Asingeke sikhangelele ukusebenza ngokuzikhandla kwalaba anduba thina sibaphe iholo elibambekayo ngoba singekela lokhu, siyabesisengozini yokukhwezela ubusela lokunye ukuganga abangakwenza bezama ukwenelisa iholo labo, ngakho kufuze sikukhangelisise lokhu njengohulumende.”
Inkuthazo kaMavima yamukelwe ngemibono etshiyeneyo ngezinye zezisebenzi zikahulumende ezikade zikulo umhlangano.
UMnumzana Cont Moyo ongumbalisi uthi sekukanengi besizwa linkulumo, kodwa kuphelele emlonyeni.
“Ngikhuluma nje kwaba lesithembiso esenziwa kudala ukuthi bakhangelele ukuhlala masinyane balungise iholo lababalisi, lamamuhla lokhe kungakalungiswa. Lakho khonokho esikutshelwayo kuyabe kungelama timeframes ukuthi kuzalungiswa nini kuyabe kuyikukhuluma nje kubengamazwi aphelelemoyeni osekusenza ukuthi loba kukhulunywa sithi hayi sizwile, asazi ukuthi kuzabanjani.”
UNkosikazi Viginia Ncube laye oyisiqhatshwa sikahulumende uthi lumhlangano osungulwe ngoLwesithathu ubafundise okunengi okuphathelane lentuthuko, kodwa ukhala ngeholo.
“Iholo esilitholayo ngingathi alikasisithisi kangoko , ngoba lapho esiyabe sikhona siyabe sifisa ukubhadalela abantwana izimali zesikolo, ukuzigcina lokugeza isifiso sethu yikuthi nxa singengezelelwa iholo ukuze lathi siphilise imuli zethu.”
UMmuzana Japhet Moyo unobhala jikelele wenhlanganiso yezisebenzi, eye Zimbabwe Congress of Trade Unions uthi ilanga ebelinzwa lamuhla ele African Public Service Day seliyize kuzisebenzi ezinengi ngesimo seholo eliphansi lompikiswano ehlala ikhona phakathi kweziqhatshwa lezi lomqhatshi onguhulumende.
"Singakhangela amaService atholakala kuPublic Service, nxa kuyikuthi nje ufuna ukuthola uncedo kungani kwawamahle ngokuthi uyamukelwa ngumuntu olezikhalazo ezinengi ongabanjwa kuhle ku employer, ongaholi kakuhle kubangelwa yikuthi ezomnotho phakathi kwelizwe awumuhle njalo idola leZimbabwe liwile. Liwa kakhulu nsukuzonke liholwa ngabanengi kakhulu kuhulumende.
Ngomnyaka ophelileyo abe Zimstats babikeukuba inengi lezizalwane ze Zimbabwe selibanjwa ngamandla ukuyadinga amadelo kwamanye amazwe amazwe angomakhelwane laphetsheya kolwandle.
Phakathi kwabantu abahlanu, abane babo babikwa behlala kwele South Africa.
Uphenyo olwenziwa ngabogatsha lwendaba zasekhaya kwele Bhilithani ngomnyaka odluleyo luveza ukuthi sebeqhatshe abongi labodokotela beZimbabwe abedlula inkulungwane ezine kusukela ngomnyaka ka 2021.
Lonyaka usuku lokunanzwa lokuqakathekiswa kwezisebenzi zabohulumende ezwekazi le Africa, linanzwa phansi kwendikimba ethi “The African Continental Free Trade Area will require a fit for purpose African Public Administration to succeed.”
Forum