WASHINGTON - Ibandla leCitizens Coaltion for Change, elikhokhelwa nguMnu. Nelson Chamisa, lithi kalibazi abantu abafake amaphepha abo endaweni lapho okulabamele ibandla leli kukhetho lwamakhansili lolwamalunga edale lephalamende.
Lithi lokhu kukhanya engani kwenziwe yinhlanganiso yeForever Associates Zimbabwe, edlelana lamapholisa ensitha aweCentral Intelligence Organization.
IFAZ iyakuphika lokhu isithi kayingeneli kwezokhetho eZimbabwe. Ibandla leCCC lithi lehluleke lokufaka amaphepha abazangena ezikhundleni zabakhangelane lezabelo – amaprovincial councils ngoba abatshelwanga yiZimbabwe Electoral Commission ngodaba lolu. Lehlulekile njalo ukuba labameli kwamanye amakhansili.
Kwezinye indawo bekungena abantu ababili kukhetho lwamakhansili lolwamalunga edale lephalamende abamele i-CCC.
Kubelokugedla kwamazinyo njalo kubandla leMDC-T, elikhokhelwa nguMnu. Douglas Mwonzora, elehluleke ukuhlawulela amalunga alo abefuna ukuncintisa kukhetho olukhulu olozayo.
Abanye babo bathi ibandla leli kalilamali loba lathola imali evela kuhlulumende phansi komthetho wePolitical Parties Finance Act.
Ayakhala lamanye amabandla ngenhlawulo obekumele ibhadalwe eNomination Court, eyokuvumela amalunga awo ukuba engene kukhetho oluzayo.
UNkosazana Ellen Shiriyedenga, obona ngezokhetho kubandla leCCC, uthi kababazi abantu bonke abangene kukhetho bengavunyelwanga libandla leCCC, asebencintisa ezigabeni lapho okulamalunga ebandla leli.
UMnu. Joseph Tshuma, okudale leZanu PF Central Committee, uthi kuzwisa usizi okwenzakala kubandla leCCC.
Forum