GWANDA - Amakhansila amahlanu aweGwanda North azise ukuthi setshiyane leMDC ekhokhelwa nguMnu Douglas Mwonzora ukuze ancinthise kukhetho oluzayo emele i-Citizens Coalition for Change kulandela ukukhethwa kwabo bengaphikiswanga kumaprimaries alelo bandla.
I-MDC ixotshe amakhansila amanengi nyakenye ayecatshangelwa ukuthi adlelana leCCC elikhokhelwa nguMnu Nelson Chamisa.Idale leNomination Court lizahlala endaweni ezitshiyeneyo zelizwe kusasa ukwamkela amaphepha alabo abazancintisa kukhetho.
Abahlanu laba babikwa bebhalele iziphathamandla zeMDC incwadi ekuqaleni kwalinyanga bebazisa ukuthi sebephuma, babalisa uMnu Standford Nkala ukhansila kaWard 1, uNkosikazi Zwelibanzi Mpofu okaWard 2, UMnu Limukani Nyoni okaWard 3, UNkosikazi Lobukhosi Malila okaWard 4 loMnu Nkululeko Malumeja okaWard 7 eGwanda North.
UNkosikazi Lobukhosi Malila uthi watshiyana leMDC lapho kubunjwa iCCC
"Ngo2018 ngangena ngeMDC Alliance, kusukela kubunjwa iCCC ngangena kuCCC so lamanje ngiyingxenye yeCCC labadala bangikhethile lapho kusenziwa amanominations bebona indlela engisebenza ngayo."
UKhansila kaWard 2 uNkosikazi Zwelibanzi Mpofu uthi laye setshiyane lebandla leMDC.
“Kuthe sekungena iCCC sahamba ngaya kuCCC lemihlangano yemgwazo yithi kade siyenza kufika amanominations abadala bangikhetha.”
UMnu Standford Nkala ukhansila kaWard 1 omunye wabatshiye ibandla leMDC Alliance uthi akula obekusenzakala kulelibandla.
“Besisebenza leCCC njalo uMwonzora kasizange sambona esigabeni ubekhona nje emaphepheni lokuthi sexotshe abantu ngale langale kodwa thina kabazake basitshele ukuthi bafuna ukusixotsha sesizwa kuthiwa uthi singabakhe.”
UMnu Limukani Nyoni ongukhansila kaWard 3 uthi bathethe lelinyathelo ukuze kungabi lokuthandabuza kusasa.
“Lokhu ngikwenze ukuthi kube sobala kubemgceke ukuthi iparty engisebenza ngayo yiCCC ngiyenzela ukuthi kusasa kungabi lomuntu ozakhuluma eyinye into ngiyenzela ukuthi kube official ukuthi mina yimi engikwenzileyo ngentando yami ngilandela isisekelo sombuso esithi umuntu ulelungelo lokuzikhethela ibandla alifunayo ungathi kusasa sukhetho ngabantu kusasa umuntu avuke ekutshela ukuthi ungaphansi kwakhe so thina sesehlukene labo kudala.”
Incwadi yamakhansila lawa yokutshiya iMDC yamukelwe ngunobhala jikelele walelibandla ezansi yemaNdebeleni, uMnu Gilbert Dube.
Kusenjalo, sokuqhamuke ukufuthelana phakathi kwabalandeli beCCC eMatobo lapho okubikwa kulokungavumelani ukuthi ngubani ozancintisa kukhetho lokudinga amalunga edale lephalamende.
Sixoxe loNkosikazi Siduduzile Moyo ongumlandeli webandla leCCC.
“Sanominator uBonginkosi Ncube wathola 13 wards sathi kuma vetting yonke into yahamba kahle sesimangaliswa yikuthi kathesi icandidate singuMadalaboy Ndebele sicela ukuthi into leyi liyilungisise kuthi kusiyafika kusasa uBonginkosi sebuyele endaweni yakhe ngoba ngeke sivote thina ngeke sivotele umuntu esingamaziyo.”
Isikhulumeli seCCC eZansi yeMaNdebeleni, uMnu Ntando Ndlela, uthi abazancintisa kukhetho bazakwaziwa ngoLwesithathu njengokutsho kukamongameli webandla leli, uMnu Nelson Chamisa.
“Ngithanda ukuthi abantu bakuzwisise ukuthi lezizikhundla yikuthunywa yikudeployer so nxa ungumntwana ungeke ukhale uthi yindaba ubaba engangithumanga ezitolo nxa ubaba sethume omunuye ezitolo bekezela mhlawumbe lawe uzakuthuma enkunini, imsebenzi minengi, imlandu minengi ekhona ezibakhona.”
Idale leNomination Court lizahlala endaweni ezitshiyeneyo zelizwe kusasa ukuze liyamukele incwadi zalabo abafuna ukuncintisa kukhetho. Wonke amabandla aphikisayo akukabi lelilodwa ebeselethule uluhlu lwabazawamela kukhetho lwalonyaka khona kumele abhalise kusasa lapho okuhlala khona idale leNomination Court. Ibandla elibusayo lona lithi selimelele usuku lwakusasa kuphela ukuthi libhalise lokubhadalela labo okumele bancintise belimele kukhetho lwalonyaka.
Forum