HARARE - Ibandla leCitizens Coalition Coalition for Change elikhokhelwa nguMnu. Nelson Chamisa lithi amagama alabo abazancintisa kukhetho oluzayo azakwethulelwa uzulu ngoLwesithathu.
Lokhu kukhulunywe ngumkhokheli webandla leCCC, uMnumzana Nelson Chamisa eHarare namuhla ngesikhathi exoxisana lentathelizindaba ngokukhethwa kwabantu abazamela ibandla leli kukhetho olukhulu oluzaqhutshwa mhlaka 23 Ncwabakazi. UChamisa uthi ibandla elibusayo lilakho ukudlala ngozulu kungethulwa amagama abakubandla leCCC kungakafiki usuku lokuhlelwa kwalabo abazancintisa kukhetho oluzayo.
Ekhuluma leStudio 7, umsekeli wesikhulumeli seCCC, uMnumzana Gift Ostalos Siziba, uthe ukuphuza ukwethula amagama abantu abazancintisa kukhetho benzela ukuvimba ibandla leZanu PF elilakho ukwenza umathanda ngamagama abazancintisa bemele ibandla leli.
Kodwa uMnumzana Joseph Tshuma, okudale leCentral Committee kubandla leZanu PF, uthi iCCC libandla lamagwala njalo lizanqotshwa okumangalisayo kukhetho oluzayo.
UMnumzana Praise Moyo, omunye wabaqhuba uhlelo lweConsensus Candidates Selection olwenziwa libandla leCCC, uthi njengokubona kwabo, benze umsebenzi omuhle njalo baqondile labo ababakhethileyo.
UNkosikazi Ellen Shiriyedenga, omunye wababona ngezokhetho kubandla leCCC, uthi ibandla lakhe lizanqoba okumangalisayo emaphandleni lonyaka.
Lokhu kusekelwa nguMnumzana Prince Dubeko Sibanda, omele iBinga North edale lephalamende ekubandla leCCC.
Kodwa ingcwethi ecubungula ezombusazwe, uMnumzana Elton Ziki, uthi bayazikhulumela nje abakubandla leCCC ngokunqoba kukhetho olozayo.
Idale leNomination Court lizabhalisa abafuna ukuncintisa kukhetho lwalonyaka ngoLwesithathu.
Forum