MATOBO: Zithwele nzima izakhamisi zeMcwazini esiqintini seMatobo eMatebeleland South lapho amasela azenzela umathanda etshontsha izifuyo zabo, ikakhulu obabhemi.
Kusukela ekuqaleni kwawonalo umnyaka sokulamadonki afika amakhulu amane – 400, okubikwa ukuba atshontshwa kulesisigaba. Inengi selilala liquthile okumvundla lilinde izifuyo. Ugogo uMagasela uthi amasela atshaya avala isibaya sakhe sabobabhemi.
"Batshontsha ebusuku, uyathi uyavuka ufice amadonki awasekho.Utshontshelwe amangaki wena? Mina ngitshontshelwe seven.Umkhondo uyake ubekhona lapha ePumula leBellevue, but sihambe siye reporter. Kwesinye isikhathi unga reporter uzwe kuthiwa dinga 3 months, ngoba bengaze behlangane labantu beqhuba amadonki abababuzi. Uyahamba umuntu ewatshontshile ahambe ehambe lawo, amasela abaleke atshiye amapholisa.Hayi uhulumende akasikhangelele ukuthi amadonki aqakathekile ngoba ayasinceda."
Esinye njalo isakhamuzi, uMnu. Mika Moyo, uthi sebaqeda amadonki akhe njalo okwamanje sebengenela lenkomo zakhe.
"Ekutshontsheni bayatshontsha kakhulu, khathesi basanda kungitshontshela inkomo ezimbili. Ngathola kuphela amabhera, ziqunyiwe eceleni komgwaqo. Akula oseke wabanjwa njengema pholiseni senga reporter kakhulu akula muntu oseke bam'bamba."
Liyakhala lepholisa lesigaba, uMnu. Never Tshuma.
"Lapha izifuyo zivele ziyaphela, okuphela kakhulu zidonki.Inkomo yebo bayakwenza kodwa hayi akuvamanga ukuthi kulandelelane. Idonki yizo eseziphelile kakhulu, abantu bayakhala indawo yonke abanye abasela vele.”
USobhuku uMhlanga weMncwazini Village ufakaza ngokulahlekelwa kwabantu yizifuyo zabo kulindawo.
“Vele izakhamuzi sesihlalela evalweni, amasela asebhahile,lapha akusafuywa la. Iqiniso akusafuywa njengama donki hayi ayaphela. Ngesikhathi sisiba lama donki la ngabe abantu abathwali nzima ukwenza imisebenzi yabo. Kodwa awusoze ubone umuntu, ungaze uye yithenga kusasa iyavuka ingekho. Amapholisa asincedise lathi siyazama ukuthi sizincedise, kodwa ke siyafisa ukuthi amapholisa asincedise."
Kwabotshwa umuntu ePumula koBulawayo kunyanga ezimbalwa ezedluleyo owayethengisa inyama yedonki. Abantu sebecangela ukuthi mhlawumbe amadonki abo ayabulawa inyama yawo ithengiselwe uzulu.
USobhuku uyaphambili egcizilela ukuthi kungenzeka ukuthi uzulu wakoBulawayo othenga inyama emigwaqweni uthenga inyama yedonki.
"Njengoba uzathenga kwesinye isikhathi, uthenga inyama ungayazi isingama piece piece ungayazi ukuthi ivele ngaphi. Yingozi yona leyo, siyezwa kuthiwa amanye amadonki abonakala endaweni zePumula ngale egangeni. Manje ngale akungeneki, ngaphandle nxa kuyikuthi uhulumende angancedisa. Abantu besiya khonangale nxa kuyikuthi azwakele kuhanjwe kulama pholisa abalezikhali. Nxa usithi akungeneki bayenzani? Bayatshaya? Aaah bayabulala, bayabulala sibili ngoba uyabezwa bekhuluma ukuthi asifuni umuntu olobumbulu bakhe. Bathi asifuni bumbulu lapha.
sikhulumeli samapholisa esabelweni seMatabeleland South, uchief inspector Mangena, uchasisa ngokwenzakala esigabeni lesi.
Izakhamizi zicela uhulumende angenele ngoba amapholisa aseyehlulekile ukubamba amasela njalo zithi azikwazi ziyalima ngani lonyaka njengoba amadonki esephelile.
Forum