BULAWAYO - Bayakhala abantu eZimbabwe ngokukhuphuka kwentengo yempahla okungapheliyo. Lokhu kwenzakala ngesikhathi idollar leZimbabwe ligugudeka okumangalisayo, ikakhulu emkambo wensitha.
Okwamanje idollar leMelika lithengwa ngamadola eZimbabwe azinkulungwane phose ezimbili zamadollar eZimbabwe – 1,888 emkambo kahulumende kuthi emkambo wensitha libiza amadollar azinkulungwane ezine – 4,000 Zimbabwe dollars. Lokhu kwenza intengo yempahla ikhuphuke phose nsukuzonke. UMnu. Salvon Nyathi, isakhamuzi sako Bulawayo, uthi amanye amavinkili asesala ukwamukela idola leZimbabwe.
"Intengo yempahla isiqanse kakhulu emavinkilini njalo sengiphila ngokucholisa umumbu engawuvunayo ngoba angisenelisi ukuthenga impuphu ezitolo sesiphila Naima."
Uyakhala loBenon Ncube, okunhlanganiso eyeZimbabwe National Students’ Union.
"Izimota ezisithwala similar esikolo lazo ziqansile loZupco laye usehambelana lezimota ezizimeleyo kunzila."
UMnu. Effort Ncube, umcebisi wenhlanganiso eyeNational Consumer Rights Association, uthi uhulumende sekumele alungisise umthetho ovikela abathengi.
"Intengo yempahla emavinkilini ikhuphuka ngesiqubu esiphezulu abantu sebesehluleka ukuthenga ukudla njalo leholo labo alikhuphukanga njalo amanye amavinkili asesala imali yakuleli."
Lokhu kusekelwa nguNkosikazi Sinothile Mbano, othengisa amaluba, othi sebephila nzima abantu eZimbabwe.
"Ahh akusaphileki kuleli yonke into ayisathengeki sesiphila ngokungwava ngwava zindlala zodwa."
UMnu. Lovemore Moyo ukakusekela lokhu. Uthi, "Umuntu kasadli kuhle imikhuhlane izahlasela maduze sesiphila njengenyoni ngoba akulanto esathengeka emavinkilini intengo zikhuphuka njalo nje."
Kuleziphathamandla zikahulumende ezithi kumele kumiswe ukukhuphuka kwentengo yempahla. Abakubandla elibusayo bathi lokhu kwenziwa yilabo abafuna ukuba kususwe ibandla leZanu PF embusweni.
Forum