BULAWAYO - Uhlelo lwekomishini ebona ngokuqhutshwa kokhetho eye Zimbabwe Electoral Commission -ZEC lokuvulela uzulu owabhalisa ukuvota ukuthi ahlole amagama kuluhlu lwe Voters Roll lwehlulekile ukuqala kuhle namhlanje koBulawayo njengesithembiso sali komishini. Namhlanje bekulilanga lakuqala kumalanga amahlanu afakiweyo yiZEC ukuthi ababhalisa ukuvota lonyaka bahlole amagama abo endaweni ezitshineyo zelizwe lapho okuvotelwa khona.
Inengi labantu edolobheni lako Bulawayo liphume ekuseni NgoMgqibelo, lile sifiso sokuyahlola amagama abo kuVoters Roll, lathola izisebenzi ze ZEC lamapholisa besithi ingwalo ezimumethe amagama abo azikalethwa kulezondawo.
UNkosaza Helen Dzivira ngomunye wabavukele endaweni ezibekwe ngabeZEC kodwa wahambela ize. "Akulamuntu othole lapho akade kuvulwe khona iBulawayo yonke bekuvaliwe. Abantu bebehlezi belindile, abantu bebemelele ukuchecker amabizo abo. Mina umbuzo wami usuku ZEC, ukuthi ma Zimbabweans asivuleni amehlo ngoba sokuqalisile. Sizakukwanisa yini nxa sisehluleka ukuthi si demande ama rights ethu, ukuthi iZEC iannounce idate umhla ka 27 to 31May."
Ugogo UMangwenya ukhala ngokuthi abeZEC badlala ngenqondo zabantu. "IZEC le yiyo efuna ukusitshayela phansi njenge minyaka iminyaka yonke. Ukusukela kwavotwayo iZEC yiyo etshayelela abantu kusukela kuko Nkomo ewinile ZEC. Into yonke into lokhe silandelela ZEC."
Unkosikazi Bongiwe Ncube uhambe labangane bakhe ukuyahlola amagama abo bathola dololo, uzonde kakhulu ngesehlakalo sanamhlanje. "Basebenza kubi mina ngitshiye ngibatshele inyongo ngale. Ngabatshela ngathi mina okutsho ukuthi mina nxa lisikhangele ngingaka ngingakangingaka lapha engivelela khona liyakwazi ukuthi kukhatshana okunganani. Khathesj abantu laba ukuthi babuya lapha ngihamba labo khonapha bezekhangela ukuthi amabizo abo nampa bayabuyela. Lithi kusetshenzwe njani? Li announceleni into yenu leyi libona ukuthi isikhathi senu esokuthi lisebenze asikafiki."
UCouncillor weMpopoma uDonaldson Mabutho ukhuthaza uzulu ukuthi angakhalali njalo engalahli ithemba kodwa abuyele njalo kusasa. "Sithi abantu bakithi bengadeli, bengadinwa lathi njengabo councillor siyabe sincedisa sibhoda sibona ukuthi ama centers wonalawo kusasa avuliwe but into sithanda ukuthi sikhuthaze uBulawayo omuhle umthwakazi omuhle ukuthi hayi bantu bakithi, asingadinwa kusasa sivukeni siyekhangela amabizo ethu. Siyakwazi ukuthi kulendaba ze demi limitation imingcele isitshintshile. Asambeni siyekhangela ukuthi uvotela ngaphi njalo uku ward iphi.
Kukhanya indawo ezinengi zelizwe abantu abenelisanga ukuhlola amagama abo namhlanje. UMnu Abednicho Bhebhe webandla eliphikisayo leCCC uthi eNkayi lakho akulanto eyenziweyo. "Ngikhuluma kunjenje eNkayi imaterial khona ifike kuma venues namhlanje. Ngezinye indlela namhla akula msebenzi ozakwenziwa bayabe besenza iset up. Njalo ngizwa kuthwa lapha koBulawayo ke imitshina kayikafiki sikhuluma kunjenje. Kutshukuthi ngezinyindlela engxenye izafika namuhla ebusuku kumbe kusasa. Ngezinye indlela kutshengisa ukuthi iZEC ayikho prepared to run these elections."
Osebenzela inhlanganiso zabalwela amalungelo oluntu uRev Anglestone Sibanda uthi okubuhlungu yikuthi abeZEC abachasisi ukuthi kungani lolu hlelo lungaqalanga kuhle namhlanje. "Kuyinto edanisayo ukuthi iZimbabwe Electroral Commission iyehluleke ukuvula ama offices abo, ngapha betshele abantu ukuthi babuye bazokhanhela bazohliols amabizo abo. Kodwa singazi ukuthi isizatho kuyini sicabangela ukuthi mhlawumbe yindaba zokuthi ama logistics ayabe engakabi in place kuyenzakala kodwa into ade siyikhangelele yikuthi basitshele in advance baxolise kuzulu."
Indawo ezinengi zelizwe okugoqela iHarare, ebe zibekwe yiZEC ukuthi abantu bayehlola amagama abo kuVoters Roll, zibikwa ziphuzile ukuvulwa kuthi lezo ezivulwe ngo7 ekuseni bezingela uluhlu lwamagama abantu. Lokhu kubangele ukuthi uMqondisi obona ngezokhetho kuZEC, umnuzana Utoile Silaigwana, ethulele intathelizindaba umbiko othi ikomishini yakhe engxenye ingacina isengeza isikhathi sokupha ithuba uzulu ukuthi ayehlola ukuthi amagama abo akhona na kuVoters Roll. Imizamo yeStudio 7 yokukhuluma laye uSilaigwana yehlule esithi sikhulume lesikhulumeli seZEC uJustin Manyau yena obengasabeli umakhalekhukhwini wakhe.
Abantu abanengi bathi bafuna ukuhlola amagama abo ukuze babone ukuthi bavotela kuziphi indawo kulandela ukwehlukaniswa kwemingcele emitsha eyafakwayo phansi kohlelo olweDelimitation olwaqhutshwa yiyo iZEC. Uhlelo lolu luyaqhutshwa kuze kuyefika umhlaka 31 Nkwenkwezi.
Forum