VICTORIA FALLS - Banengi abantu abasebenzisa amafutha atshiyeneyo, agcotshwa ikakhulu ngabesifazana abafisa ukuba lejwabu elimhlophe.
Kwesinye isikhathi imizamo yokuthi abantu babebahle itshiya belamaqhubu ebusweni njalo abanye bemnyama tshu.
UMnumzana Tedias Sibanda, ohlala eVictoria Falls, ngomunye wezimuli ezilondoloza izigulane ezehlukela ukusila izilonda ejwabini osekwehlule labezempilakahle.
USibanda uthi umzukulu wakhe oyintombazana owayeseleminyaka eminengi egcoba amafutha agoqela iCarolite, iMorvet kanye le Epiderm kwathi dlwe kibo ububi bawo lapho sethe wehlelwa yingozi yokugwazwa kunyanga edluleyo, osekuze kwafika namuhla inxeba lilokhe lixhwatha.
“Sasingathungeki sona iskin ukuthi kubambane izinyama sacina sesithwele nzima saluza izimali ezinengi ukuthi manje njengoba wayelimele kangakana ngamambodlela ngabangane bakhe ezeyethungwa ngaphi manje. SahambeZambia ezibhedlela kwathiwa kathungeki ngoba inyama lezi ziyabe zingasabambi kuhle kuhle. Sacina simekel’enjalo lakhathesi kakapholi.”
Ubunzima lobu bugcizelelwa nguDokotela Thabani Moyo, okhokhela isabelo seMatabeleland North, kuhlangothi lwezempilakahle olweEpidemiology and Disease Control. Uthi ukugcoba lokhu kanye lokuhlaba ijekiseni yokutshintsha umbala ubemhlophe akulungelanga izigijimi zomzimba ama-hormones kanye lejwabu.
Wengeze njalo esithi uhlupho lolu lubangelwa yikuthi amaphilisi asethengiswa nje mahlayana, lobanje ezilindweni zamabhasi.
“Yinto eyazakalayo ukuthi ungasebenzisa amafutha la isikhathi eside ayakuphambanisa ijwabu, kodwa abantu abantu bathanda khonokho okubi ngawo ukuze bethole abakufunayo ukubamhlophe kodwa kuyayenza umuntu ophe ngaphakathi kwejwabu so ungalimala ukuthi usile kubanzima kakhulu ngendaba yokuthi ijwabu liyabe selibuthakathaka.”
Okunye njalo, uMoyo uthi kuyalimaza izinso kanye lesibindi, ikakhulu kwabahlabayo.
UMnumzana Kelvin Moyo, omele izakhamizi kunhlanganiso yeVictoria Falls Combined Residents’ Association, uveze ukuba abathengisa amafutha okutshintsha ijwabu bawathenga eZambia.
“Siyaxwayisa kakhulu ukuthi abomthetho nxa bengaqinisa ukuthi amaproducts lawa indlela zonke ezibuya ngayo kusamele zivalwe ukuthi kungagcwali emphakathini, labakusebenzisayo bephunguleke.”
USenior Assistant Commissoner Paul Nyathi, isikhulumeli samapholisa eZimbabwe, uthi udubo lolu solusabalele lasemaphandleni.
“Elizweni lonke akula indawo esingathi thina ihlukene njalo nxa sisenza ama patrols siyathola ukuthi amadrugs lawa siyawathola endaweni ezinengi, so siyacele kakhulu ukuthi uzulu aqaphele njalo okumelanga bathenge nje izinto bengananzelelanga indaba zempilo.”
UNyathi uthi ngeSonto kubotshwe abantu abangamatshumi ayisithupha lanhlanu - 65 abathengisa amafutha la kanye lezidakamizwa kulandelwa ukusungulwa kohlelo olulesihloko esithi ‘No to dangerous drugs and illicit substances’.
Ngaphansi kohlelo lolu, sekubotshwe abedlula amakhulu ayisithupha lokhe umnyaka uqalileyo bemanyane labe Medicines Control Authority of Zimbabwe.