BULAWAYO - Isile ngesikhala senalithi inkokheli yeqembu leHighlanders abalandeli beqembu sebefuna ukuyisusela amanqe emhlanganweni oqhutshwe namuhla eBosso Clubhouse.
Bathi indaba zemali aziqondakali njalo basola ukusebenza kwalinkokheli.
Kulabalandeli beqembu akade befune ukuba kuxotshwe inkokheli yeqembu leli emhlanganweni lo kulandela ukuxokozela okumangalisayo phezu kodaba lwemali okuthiwa kayisetshenziswanga ngemfanelo nyakenye.
UIsaac Donga, olilunga leHighlanders, ubefuna abaphathi beBosso baxotshwe
"Abantu bebesithi bahambe ngoba abasuthiseki ngendlela abaphathe ngayo imali yikho okwenze abantu bathukuthela ukuthi kabahambe."
Omunye njalo umlandeli weBosso, uChris Zulu, uthi abaphethe leliqembu bayalwa.
"Umhlangano ubekhona kodwa kuning kakhulu okungahambi kahle okungalimaza iqembu lethu. Umakungaqhubeka kungaliyandlela kungalungiswa l think mele bele lesambulula, ikakhulu indlela iboard ne executive ezibonise ukuthi zisebenza kanjani phambi kwamamembers akusimo esihle lokhuyana kuyalimaza iqembu. I think in the near future kumele kulungiswe ukuthi iqembu lethu libe right."
Owake waqeqetsha iqembu leHighlanders labafanyana abancane, uAli Baba Dube, uthi inkokheli yeBosso isiyehlulekile.
"Akuhambanga kahle vele into zangakhona bekungaqondakali ukuthi iboard iyangenela, iexecutive bayalwa njengo chairman kalaleli muntu yena uthi unguye."
Ukwehlula ekuqaleni komnyaka lapho umgciningcebo weqembu, uBusani Mthombeni, angazange aphakele khona abalandeli ukuba imali imi njani kwenze kwaba lokuxokozela emhlanganweni oqhutshwe namuhla. UNhlanhla Bahlangene Dube, owake waba ngunobhala waleliqembu, ulandisa ngokufuthelana kwamalunga eBosso.
"Siyakunanzelela ukuthi kuphuzile kwaze kwafika ngalesi isikhathi okwenze ukuthi umhlangano namuhla ubengumhlangano onzima kakhulu ngoba abantu bebefuthelene kwabuya kwathi ama auditors afika ayibeka indaba yabo bayichaya kwakhanya ukuthi kulento ezimbalwa mhlawumbe ebezingaphathwa kuhle, wasekusenza ukuthi le-board layo igcizelele ukuthi kulento ezingahambi kuhle kukhanya-ke ukuthi kulokungasebenzisani kuhle phakathi kwe-board le-executive."
Omunye njalo nguModern Skhuthele Ngwenya, owake waba ngumpathi weHighlanders, ochaza ngokwenzakale kulumhlangano.
"Kube lokuphikisana kakhulu abanye besithi hayi yona i-executive kayitshayephansi, kayihambe. Kube lombono wokuthi kube le-vote of no confidence abanye baphikisa kodwa iboard yacela yancenga sibili ukuthi hayi asibanikeni ithuba ukuthi belungisise amaphutha abo. So, yikho lapho esikhona khathesi."
ULuke Mkandla, umgcinisihlalo weBoard of Directors kuqembu leHighlanders, uchaza ngobudlwangu dlwangu obubekhona.
"Ngemva kokwedluliselwa phambili azakuya ngemva kwenyanga, inyanga zaze zaba ngu 4 months khonokho kuhluphile kwasekusithi ama auditors akukhulumileyo lapha kukhanya engathi akutshengisi. Akutsho ukuthi kwathathwa izimali kodwa akutshengisi ukuthi azithathwanga, kutshukuthi amalunga bebedinga ama members ukuthi okuyikho yikuphi pho njengoba ama auditors ethi mmm angeke bakhulume okuhle ngalokhu abakubonileyo."
Isisekelo sombuso weqembu leHighlanders sithi iBoard yeqembu yiyo okumele iphathe intambo nxa kungenzeka ukuba i-executive isuswe esikhundleni kodwa iBoard yalile. Umhlangano wanamuhla uqhutshwe ukuze inkokheli yeqembu iqedise ukuphakela abalandeli beqembu ukuba imali yeqembu isetshenziswe njani nyakenye kodwa kwehlule ukuthi amalunga aleli qembu akuzwisie.