HARARE...................................
Ele Zimbabwe linanza iminyaka elitshumi yokulotshwa kutsha kwesisekelo sombuso abasilobayoo besithi uzulu kumele asisebenzise ngokugcweleyo ukuze amalungelo oluntu alondolozwe. Abanye njalo ngabakhuthaza ukuthi kumele isesekelo sombuso sifundiswe ezikolo ukuze abantwana basijwayele besesebancane.
Lokhu kuphume emhlanganweni oqoqwe ngabenhlanganiso ye Crisis in Zimbabwe Coalition owenzelwe e Harare, NgoLwesihlanu, lapho okukhulume khona oMnu Douglas Mwonzora lo Paul Mangwana bona ababengabagcinisihlalo bekomiti yedale lephalamende eyalwaula ukulotshwa kwesisekelo sombuso lesi ngomnyaka ka2013, eyeConstitutional Parliamentary Commitee (COPAC).
UMwonzora lo Mangwana bathi isisekelo lesi sinekeza uzulu amandla phansi kwesigaba samalungelo oluntu loba iDeclaration of Human Rights njalo nxa kuqakathaniswa lamanye amazwe isisekelo sombuso we Zimbabwe singcono kakhulu kodwa okufunakalayo yikuba sifundiswe uzulu wonke okugoqela lezikolo.
Ummeli we Mazoe North edale lephalamende uMnu Fortune Chasi ngomunye wabakhuthaza ukufundiswa kwesisekelo sombuso ezikolo.
"Kuqakathekile kakhulu ukuba siqale ukufundisa abantwana besesebancane ukuba bazi ukuba isisekelo sisetshenziswa njani. Lokhu kumele sikwenze abantwana besebancane"
Ummeli we Hwange Central uMnu Daniel Molokele uthi kuyajabulisa ukuba ilizwe lilesisekelo sombuso esenziwa nguzulu we Zimbabwe esithi kumele isisekelo lesi kumele silandelwe.
"Okunengi thina esingajabuli ngakho yizinto ezifana le devolution. Kumele abantu benelise ukuzibusa bodwa. Sihle ngoba sile Bill of rights, okwenza ukuba amalungelo oluntu ahlonitshwe"
Lokhu kusekelwe ngu Mnu Witness Dube owebandla le MDC-T yena othi kumele uhulumende aqale ukulandela isisekelo lanxa eminye imithetho ingakalolongwa ukuba ihambelane laso.
"Asingeke sithi sekuhambe kuhle. Kunengi okungakwenziwa okufana lokwehliswa kwamandla esiya kuzulu wonke. Lokhu kutshengisa ukuba lokhe siphiwa amandla ngabaphathintambo bakahulumende"
Obe emele uhulumende kulumbuthano uNkosikazi Ntando Hlabangana uthe uhulumende uzimisele ukulandela isisekelo esithi uphakathi komsebenzi wokuba imithetho yonke ihambelane lesisekelo sombuso.
"Kulabantu abanengi okumele baphatheke kuhlelo lolu. Ugatsha lwethu yilo olwenza umsebenzi lowu. Kodwa ukuba lokhu kwenzakale kumele sisebenze ndawonye sonke uhulumende labantu"
Isisekelo sombuso saqala ukusebenza ngo Nkwenkwezi ngo mnyaka ka 2013 kodwa okumangalisa abanengi yikuba sesiguqulwe kabili sinekeza uMongameli amandla okukhetha uMahluli omkhulu womthethwandaba waphezulu labalandeli bakhe kulokuthi lokhu kwenziwe lidale lephalamende.
Abanye bathi lobanje ilizwe lilesisekelo esitsha okuqakathekileyo yikuba uhulumende usisebenzisa njani hatshi ukuba silemithetho emitsha loba hatshi.
Kulemithetho efika amakhulu amathathu 300 okumele ilolongwe ukuze ihambelane lalokho okumunyethwe yisisekelo sombuso welizwe.
