VICTORIA FALLS......................
Abenhlanganiso eyeNew Apostolic Church Relief Organisation basungule uhlelo lokwabela izakhamizi zeHwange ilambazi elakha umzimba.
Lokhu bathi bakwenze ngemva kokunanzelela ukuba inengi labantu kusabelo lesi likhangelane lesimo sendlala olubangelwa yikuswela isivuno ngesimo sokuguquka komkhathi kanye lobudli benyamazana zeganga osebuvamile kulezizabelo.
Esethula loluhlelo ebandleni le New Apostolic Church, uMnumzana Fredrick Mafira uveze ukuba usizo lwelambazi leli likhangelelwe ukunceda abangaba zinkulungwane ezingamakhulu amane lengxenye-4,500 ngenyanga edolobheni le Victoria Falls, laseziqintini eziseduzane lalelidolobho ezemaphandleni.
Uqhubeke echasisa ukuthi kuyini sibi sibili okwabafuqayo ukuba basungule loluhlelo ngemva kokuhlangana lomama owayesithi abantwabakhe badla ilaja nxa bezakuya esikolo, lakho mhlazana likhona.
“Wasethi kwesinye isikhathi bengadla isitshwala santambama singasala yiso asithwalayo ahambe laso esikolo, kodwa nxa singasalanga uhamba esikolo engathwalanga lutho abesecela ukudla kwabanye abantwana bemcedisa sasesibona ukuthi kufanele sisize ngelambazi leli. Sabiza abafundisi bamabandla onke kusukisela kumaZiyoni, amapostoli lama Pentecoastal sathi umsebenzi wabo ngowokukhangela abagogekileyo, abakhulileyo labangezwa kuhle emzimbeni, yibo abantu esibafunayo ukuthi sibancedise.”
UMfundisi Moses Chipadza owebandla le Apostolic Faith Mission esigabeni seLupinyo obeze ukuzoholela ibandla lakhe laye ukhale ngodubo lwendlala kulesisigaba.
“Uhlupho olukhona yindlala, ngoba indawo yethu ngendaba ye climate change abantu abavuni okungabaphilisa njalo bengathola khonokho okuncane okuyabe kukhona, kulohlupho lwezinyamazana ziyabuya zidle becine bevuna okuluthswana.”
UNkosikazi Margaret Ngunda osebenzela kulesisabelo ngaphansi kohlangothi lwe Social Welfare uthi uhlupho oluvame kakhulu ngolokusweleka kwempuphu kulabo abampofu, abagulayo labakhubazekileyo.
“Into kakhulu abaziswelayo uyathola ukuthi uyabe engelampuphu kumbe umntwana eswela ukudla esiya esikolo.”
Uhulumende weMelika ngaphansi kwenhlelo zeUSAID kuphenyo abalwenzayo olwe Zimbabwe Food Security Desk Reseach: Matabeleland North Province, babika ukuba inengi kalitholi ukudla okwakha umzimba okufana lendumba, amaqanda kanye lenyama.
Lokhu kwagcizelelwa njalo ngabe Zimbabwe Vulnerability Assessment abathola impumela ethi isabelo lesi njalo silensane ezinengi ezingakhuli kuhle ngokuswela ukudla okwakhayo, okungahambelani lokukhangelelwe luhlangothi lwenhlanganiso yomanyano wamazwe womahlaba, olubona ngezempilakahle, olwe World Health Organisation.
Ingqobe yatshiyelwa uhulumende ukuba akhangele lesisabelo ngalabo kunye labesifazana abakhulelweyo kunqatshelwa ukuba bengabelethi insane ezingelamzimba eyakhekileyo.
Abenhlanganiso yeUNICEF babika ukuba eZimbabwe kulabantu abangaba yizigidi phose ezithobaminwemibili- 7.7 million, ababhekane lendlala, njalo udubo lolu lubangelwa yisimo somnotho lesivuno e
siphansi esidalwa yikungani kuhle kwezulu ngenxa yokuguquka komkhathi.
