MANGWE..........................
Izakhamizi zesinqintini seMangwe esabelweni seMatabeleland South, bakhala ngokukhuphuka kwenani labantwana abangamantombazana abazithwala bebancane besese ngabantwana besikolo semfundo yaphansi.
Kusukela kuqala ukumemetheka komkhuhlane weCOVID-19 udubo lokuzithwala kwabasakhulayo lokhu luqhubekela phambili.
Uphenyo olwenziwe yiStudio 7 luveza ukuba inengi lamantombazana la, ngaleminyaka engaphansi kwetshumi lesithupha 16.
Izikolo phose zonke zalumango zithi zilamantombazane athize abatshiye imfundo ngokumitha. EMaMbale Secondary School kusibanga sika form 4 kuzithwale amantobazane adlula amatshumi amabili eminyakeni emibili edluleyo.
UNadia Moyo ufunda kulesisikolo uthi ulabangane bakhe abangasafundi ngenxa yalolu dubo.
"EMambale like abantwana abanengi they lead to school dropouts ngokuzithwala abanye ngokuswelakala kwe School Fees. EMambale l think they are almost 20 something "abasebezithwele" ehe, bamithiswa ngobani? Abanye ngamaschool leavers abanye bayabe bengakwazi ngabantu abadala bayashela abantwana beskolo then yikho oku disturber imfundo yabantwana beskolo eMambale."
Omunye olomzali ongekhoyo nguViganani Dube yena laye selengane wamitha eleminyaka elitshumi lane 14 kodwa ubaba womntwana kamazi
“Ngile 16 years umntanami ule 2 years khathesi, Ngamithiswa nguSimba wala isisu, wayebuye ngomsebenzi lapha eHobhodo umama usegoli, ubaba angimazi. Kunzima ukugcina umntwana, uzqenzani manje, ngizamkhulisa njengoba khathesi ngihlala logogo lomnawami”.
Amanye amantombzana la amithiswa ngabesilisa abakhulileyo. UPatricia Dube uleminyaka elitshumi lasitshiyagalombiil 18. Yenake uthi uzwa ubuhlungu ngokwenzakalayo eKhalanyoni.
"Sometimes abanye bayabebengaba fosiweyo ukuba labantwana abanye bethole abantwana bengabafuni. Okunye kuyikuthanda izinto like umuntu ekurobhe imali lanxa ungathola umntwana ngimncane ngithole legcikwane ngimncane, ngeke ngikwanise ukuzi maintainer phela ngisamncane ngisadinga impilo yabazali."
UDokotela omkhulu wesibhedlela se Brunaberg uDr Tau Sithole uthi ukuswela imfundiso lokuqondiswa ngempilo ngenxa yokuswela abazali kwenza abantwana bamotshe ikusasa yabo.
"Abanye abazali basegoli kumbe base Botswana babuya ngamakhefa so isikhathi esinengi umntwana uhlala logogo. So umntwana nxa ehla logogo isikhathi esinengi yibo laba abaqalisa ukwenza ukungezwa ngoba ugogo lokhulu bengalala bona yikho abaphumayo kumbe nxa ugogo emtshele laye ulaye. Inengi labo abanye nxa ukhuluma labo abafuni kuveza angazi kumbe yikuthi bayabe betshelwe ngabadala ukuthi bengakhulumi ngoba indaba le siyazi ukuthi iyabophisa but isikhathi esinengi abanye uyathola ukuthi vele bona bebodwa bebancane yibo abamithisana bebodwa. Ezikhathini futhi kukhona labadala abayenza njalo. Udubo yikuthi thina kukhanya khathesi ku Health asivunyelwa ukuthi sirepote ngoba kuyathwa sungeneleendabeni endabeni yikuchasisela loku khansela abadala kuyibo abafanele behambe bona labo bayathula kabahambisi."
Inkokheli zomdabu lazo zithi okwenzakalayo kuluhlazo. UMlisa uHerdman Matenga weNtali Village eMambale uthi kumele kusetshenzwe nzima ukuqeda loludubo.
“Into esiyinanzelelayo ngabanye abantwana, bahleli beyibo bodwa emakhaya bengala abazali abalabo khonalokho kuyabangela izinto ezinjalo sikhanya sihlangana lobunzima obukhona ,noba siyinkokheli zomdabu kodwa ke siyaludinga uxhaso ukuthi ma sihlangana lento ezinje sithola labangasincedisa siyefika kulezo ndawo ezinjalo sincedakale.
Ngenyanga kaNcwabakazi ngo 2020, uhulumende weZimbabwe wafaka umthetho omutsha wokuthi abantwana bezikolo abazithwala befunda kabavunyelwe ukuthi babuyele ezikolweni bayeqedisa izifundo zabo bengabeletha. Inengi labantu lithi umthetho lo yiwo osumemethekisa ukuzithwala kwamantombazane amancane. Isikhulumeli sogatsha lwezemfundo yePrimary leSecondary School uMnu Taungana Ndoro uthi uhulumende wakhe sesenza ezinye inhlelo zokufundisa abasakhulayo ngobubi bezocansi bebancane.
”Siqhubekela phambili njengo hulumende sincedisa njalo siseluleka amantombazane labafanyana ukuthi bangajahi ukuya emacansini bengakaqedi isikolo, sixoxisana labo ukuthi ukwenza njalo kungamotsha ikusasa yabo. Lokho kuyasincedisa ukwehlisa udubo lolu kodwa kwezinye izigaba kuyasikhathaza ngoba udubo lolu alwehli.
Izakhamizi zithi abantwana abasakhuzeki sebezenzela umathanda. Ngenyanga ka Zibandlela loNhlolanja ngomnyaka ophelileyo uhulumende ubika ukuthi amantobazane afundayo azinkulungwane ezinhlanu 5000 bazithwala besesikolweni njalo kulenani labanengi abendiswa bebancane. Kuloba amantombazana amithayo amanengi akhona engaphansi kweminyaka evunyelwa ngumthetho wokuthi angathandana lowesilisa, amapholisa akulindawo alile ukukhuluma le Studio 7 kodwa akhuthaze abazali abalabantwana abamithisiweyo ukuthi kube yibo abatshela amapholisa.
