WASHINGTON - Kulabantu eZimbabwe abathi akumangalisi ukuba ibandla leCitizens Coalition for Change (CCC) elikhokhelwa nguMnu. Nelson Chamisa lehluleka ukuphuma lamagama abantu abazalimela kukhetho olukhulu oluzakwenziwa lonyaka.
Bathi iCCC kwakumele ikhethe abazayimela kukhetho lolu ngokudinga abantu kusetshenziswa ukhetho lwama primaries hatshi uhlelo lweConsensus Candidates’ Selection Process.
Abakubandla leli bayavuma ukuba kwesinye isikhathi babhekane lohlupho lokuqoqa uzulu ezigabeni ezitshiyeneyo ngesikhathi bedinga amalunga azabamela kukhetho oluzayo.
Kusenzakala konke lokhu, ibandla leMDC-T, elikhokhelwa nguMnu. Douglas Mwonzora, lalo lithi selidinga abazalimela kukhetho oluzayo.
UMongameli Emmerson Mnangagwa ukhangelelwe ukuba uzabikela uzulu kumaviki alandelayo ngosuku lokhetho oluzakwenziwa ngoNtulikazi kumbe ngoNcwabakazi.
Ukuze sihlaziye okwenzakala kuCCC, uMnu. Ostallos Siziba, umsekeli wesikhulumeli sebandla leCCC, loMnu. Nhlanhla Moses Ncube, okunhlanganiso yeFreedom Alliance.
USiziba uthi bahlangane lenkinga ezimbalwa ekuqhubeni uhlelo lolu.
UNcube uthi aluqhutshwa ngemfanelo uhlelo lweConsensus Candidates Selection Process.