HARARE - Kulabatsha abathi ukuyafunda emakolitshini yikuchitha isikhathi ngoba labo abangafundanga kangako bakhomba ngophakathi, abafundileyo besidla inqweqwe zomlomo.
Osakhulayo, uBhekimpilo Ncube, ohlala koBulawayo, uthi kungcono ukuphanda imali kulokuyafunda emakolitshini ezifundo zaphezulu.
"Kunzima mfowethu ngoba sinanzelela ukuthi inani labantu abangaqhatshwanga liphezulu kakhulu, okungangokuthi ukuya eUniversity yikuchitha isikhathi lokudlalisa imali, ngoba umuntu uzaqeda lelo degree kodwa eswele umsebenzi. Ngakho, kungaba ngcono ukuthi nxa ubuzathengisa inkomo ubhadalela iDegree lelo, kangcono imali leyo uyisebenzise ukuvula ibhizimusi. Abantu abanengi abayenza imali ezwayo kweleZimbabwe, ngabantu abathengisayo- abalamabhizimusi abo."
Kodwa uBenon Ncube, okhokhela inhlanganiso emele izifundi eyeZimbabwe National Students' Union, uthi kuqakathekile ukufunda emakolitshini.
"Kuzafika isikhathi lapho ilizwe lizalunga khona. Lapho elilunga khona, abantu kuzamele bakhuphe amaphepha atshengisa ukuthi bafundile ukuze baqhatshwe. Akusoze kuthathwe abantu okuthiwa ngamaDealers, abalemali- kuzafuneka abantu abazangena imisebenzi, abalamaphepha. Yikho sisithi abatsha kabaqhubeke ngokufunda, kungenani lokuthi bengabe bedhinga imali ngezinye indlela ezitshiyeneyo."
UMerjury Mathe, ohlala eKwekwe, uthi uma abasakhulayo behlolisisa okwenzakala eZimbabwe kulez'insuku babona engani ukuthola isithupha semfundo yaphezulu akuncedi lutho.
"Ngibona ingathi iUniversity siyibona njengento eqakatheke kakhulu, kodwa kumbe kumele sitshintshe umbono lowu. Abanengi abaya emisebenzini bephuma eUniversity, bayaqalisa kutsha ukufundela imisebenzi ngoba lokhu abakufundayo kutshiyene lokwenzakala emsebenzini. Ezinye izifundi eziya khona eUniversity, ngezifuna ukuCramer ukuthi bepase kuphela. Ulwazi lwomsebenzi lungcono kulesithupha seDegree."
Isikhulumeli senhlanganiso yababalisi eyeAmalgamated Rural Teachers' Union of Zimbabwe, uMnu. Thembakuye Moyo, uthi uhulumende nguye owenza ukuba abatsha bakhangelele phansi izifundo lezi.
"Kulezinsuku ungathola umuntu oleDegree, oleDiploma kumbe ole Masters, esebenzisa indlela ekhulunywa ngumongameli okuthiwa yikungwavangwava- angazi ukuthi kutshoni ukungwavangwava- kodwa uzathola ukuthi laba bantu beqeda isikolo, kabatholi imisebenzi. Lokhu sokwenza intsha izibonele kungcono ukuthi ingayi esikolweni kodwa iyengwavangwava. Kabamiseki abatsha ukuthi banakane ngaleyi ndlela nxa bebona okwenzakalayo. Okufunakalayo yikuthi kubiselwe isizota semfundo kuzinga eliyilo eliqondileyo. Isizotha semfundo kasisakhanyi ngoba abantu bafundela ukuyasebenza, kodwa imisebenzi akula. Kodwa leyo ekhona- eyokufundisa, omongikazi, odokotela, kayila mali ngoba abantu baholiswa iholo lezigqili."
Umkhokheli wenhlanganiso yeZimbabwe Christian Alliance, uMfundisi Useni Sibanda, uthi abatsha kumele befunde okuzwayo ngoba balakho labo ukuthola amathuba emisebenzi elohlonzi kwamanye amazwe.
"Ontanga abanengi bengabe becabanga ukuthi ukuya esikolo sekuyikumotsha isikhathi, kodwa kumele sibafundise ukuthi umhlaba wonke usuyilizwe elinye, elilodwa. Ngakho ungakwanisa ukuthi ufunde lapha eZimbabwe kodwa uyethola umsebenzi eSouth Africa, eU.K kumbe kwezinye indawo, ngenxa yokuthi lokhu okufundayo lapha, ungakusebenzisa kwenye indawo. Ngakho ukufunda kuqakathekile."
Umphathintambo kahulumende obona ngezemfundo yaphezulu, uSikhwicamfundo Amon Murwira, uthi abatsha akumelanga bemelele ukuqhatshwa uma sebephutshe izifundo zabo. Uthi kumele besebenzise ulwazi lwabo oluphezulu ukwenzela ukuziphilisa.
UMurwira uthi kumaviki asanda kwedlula, izikolo zemfundo yaphezulu zaphiwa izicoco nguMongameli Emmerson Mnangagwa zokwenelisa ukulungisa okutshiyeneyo ngemitshina yakulez'insuku okuncede ilizwe ukuba lingakuthengi kwamanye amazwe.
Umeli wePumula edale lephalamende njalo olilunga lekhomithi ebona ngezisebenzi zikahulumende lenhlalakahle kazulu kulelidale, uNkosikazi Sichelesile Mahlangu, uthi umbono wokuthi ukuya emakolitshini yikuchitha isikhathi uzabisela muva ilizwe..
"Ilizwe lethu alizame ukuguquka shuwa ngoba abatsha laba yibo abakhokheli bakusasa. Ngesikhathi sekufanelwe ukuthi abatsha laba behambise ilizwe phambili, bayabe bengasekho, lokuphuma elizweni sebephumille. Lemfundo yethu eyaphezulu, kuyabe sokungasela muntu ofundileyo, ngoba bebona ukuthi kungcono bazidingele imali. Eqinisweni, elizweni lethu, ongafundanga kwesinye isikhathi ule mali ukwedlula ofundileyo. Kudala kwakunganje."
Kulinganiswa ukuba izikolo zemfundo yaphezulu eZimbabwe zipha izithupha zokuphutsha izifundo, kuzifundi ezingafika inkulungwane ezingamatshumi amane, 40,000 ngomnyaka. Kodwa balutshwana okumangalisayo abenelisa ukuthola imisebenzi kumankampani lakuhulumende. Abanye behluleka ukwenza imisebenzi yezandla ngenxa yokuswela imali, ukusilela komlilo kagesi lokunye.