WASHINGTON - Abantu abanengi baqhubekela phambili bexoxa ngenotho kaNkosikazi Bona Chikore Mugabe, indodakazi kamuyi uRobert Mugabe, loMnu. Simba Chikore, egoqela izindlu lamapulazi okufika phose amatshumi amahlanu.
Bathi kukhanya engani kulamalunga ebandla le-Zanu PF amanengi kakhulu alamapulazi lezindlu ezinengi okumangalisayo.
UNkosikazi Chikore usesehlukana loChikore ngoba ababili laba bathi kabasathandani ngitsho lakancane.
UNkosikazi Chikore ufuna ukuthi anikwe ngumthethwandaba imvumo yokuthatha amantwana bonke njalo lokuthi babelane ngemfanelo impahla abayisebenzela besahlala bonke.
UChikore, ozonde okwamagama nguye owaphenyaka udaba lolu emthethwandaba esithi kumele lulungiswe ngemfanelo.
Sixoxe ngodaba lolu loMnu. Joseph Tshuma, okudale leCentral Committee kubandla leZanu PF loNkosazana Ellen Shiriyedenga okubandla leCitizens Coalition for Change.
UNkosazana Shiriyedenga uthi kumele kuhlolisisiwe inotho yababili laba ngoba kwakungeke kwenzakala ukuba beyithenge bengela bazalo abakuhulumende ababesenza ubukhohlakali.
UTshuma uvumelana laye esithi amalunga amanengi akubandla elibusayo kawala mapulazi lezindlu njengo Nkosazana Chikore lomkakhe.