BULAWAYO.........
Iqembu lamantombazana amathathu, ababili babo abafunda esikolweni se secondary eseGirls College koBulawayo loyedwa ofunda eBeitbridge, linqobe emncintisweni wokulungisa izinto kusetshenziswa imitshina yangalezi nsuku, eye technology, oweUnited States of America Texpo 2023.
Lumncintiswano uqoqwe ngabesigodlo sommeli weMelika eZimbabwe, wenzelwe ekholitshini eleNational Univesity of Science and Technology- NUST elikoBulawayo.
Abathathu laba ababalisa, Pfuluphedzani Mabidi, Layla Mutukwa lo Tendai Jakatinda banqobe ngohlelo lwabo lokuphuma lezibane eziqondisa ukuhamba kwezimota amatraffic lights, asebenzisa amandla elanga lebattery lokulondoloza lawo mandla ngensuku lapho eliyabe lingatshisi okwenelayo.
Amantombazana la anqobe amanye amaqembu amathathu abakade bephiwe imisebenzi yokudla engqondo besebenzisa imitshina yakulezi insuku.
EleMelika liphakathi kokuhlomisa abasakhulayo beZimbabwe ukuba baqale ukukhwabitha imisebenzi yokusebenza kwemitshina yakulezi insuku ekuphumeni lamasu anceda umhlaba.
UNkosazana Layla Mutukwa ongomunye wabakuleli qembu elinqobileyo uchaza kabanzi ngomsebenzi abawenzileyo wokuphuma lesibane sokuqondisa ukuhamba kwezimota emgwaqweni.
“Iqembu lethu lenelise ukulungisa amarobots sisebenzisa amandla elanga lebattery njalo ulakho ukulisebenzisa endaweni ezehlukeneyo liyathwaleka buye lilungele lemigwaqo elabafundi abanengi uyakhona ukumisa izimota udlule ngokufithizela isibhono esisemphongolweni werobot.”
UNkosazana Nomalungelo Ncube abathethe isicoco sesibili uthi bafunde okunengi nge USA-Zimbabwe Texpo.
“Thina sifunde okunengi lapha sibuye singelalwazi kodwa imfundiso esiyithole lapha isenze saqeqetsha ekulungiseni imitshina elakho ukusiza umphakathi lathi sibelenzuzo sidale imisebenzi emhlabeni.”
UThabolezwe Mabandla ofundela ukuba ngumanjinela ekolitshini eleUniversity of Zimbabwe yena labanye bakhe bathethe isicoco sesithathu. Yenake uchasisa ngomtshina abaphume lawo owazisa ngokuchitheka kwegas endlini.
“Mina labanye bami senelisile ukusebenzisa imitshina yakulezi insuku sabumba umtshina wokubonisa imuli ukuthi kulegas echithekayo njalo siyabonga imfundiso esiyithole lapha.”
ULebohang Sebata labanye bakhe bachaza ukusebenza kwamandla kagesti legenerator emakhaya elizicitsha lokuzilayitha kungelamuntu okwenzayo.
“Owethu umtshina esiwubumbileyo silakho ukuwuthengisela amankampani anjengeTelco leEconet sikhangelele ukuqhubekela phambili silungisa eminye imitshina ngemfundiso ejulileyo esiyithole lapha.”
Ukusebenza kwemitshina yakulezi insuku kaqakathekile yikho libona uhulumende weMelika esekela uhlelo lolu, kutsho ummeli weUSA oqibdisa inhlelo kuleli uNkosazana Meg Riggs.
“Uhulumende weMelika ulesifiso esikhulu sokusebenzelana lohulumende wakuleli ukuze siphume lemirshina ezaletha intuthuko emhlabeni njalo sizaqhubeka sisebenza ndawonye ukuze sithuthukise umhlaba silungisa inhlupho ezikhona ngemitshina yakulezinsuku ekhona lakuleli.”
Abafundi abanqobe kumncintiswano oweZim/ USA Texpo 2023, bathole imivuzo ethile njalo bazadlulela phambili bayencintisa kumncintiswano oweSA-Zimbabwe USA Texpo 2023.
NgoNgcwabakazi kusukela mhlaka 14 kusiya ku20, abathathu laba bazaba lethuba lokuphatheka kuhlelo olwe Cape Town Technology Immersion Program, lapho abazathola imfundiso ejulileyo kwezemitshina yakulezinsuku, ngokwethekelela amankampani ahlukeneyo lakumakolitshi emfundo yaphezulu ukuze balolonge ulwazi abalalo lwemitshina yangalezi nsuku, olweTechnology.
Uhulumende weMelika uthi uzahlala eqhuba amaTexpo la ezweni ukuze izizalwane zase Zimbabwe lazo ziyenelise ukuphuma lemitshina yakulezinsuku baqale amabhizimusi abo.
