MARYLAND - Abantu abanengi eZimbabwe bathi bamangaliswa yinotho kaMnu. Simba Chikore lekhosikazi lakhe, uNkosikazi Bona Mugabe Chikore, indodakazi kamuyi uRobert Mugabe, owayengumongameli welizwe.
Bathi kuyamangalisa ukuba ababili laba balezindlu lamapulazi okufika phose amatshumi amahlanu, osokumele bekwabelane njengoba sebesehlukana.
Ababili laba bathi kalusekho uthando phakathi kwabo ngakho-ke bacela umthethwandaba ukuba wethule isinqumo sokuthi impahla kumele yabelwane njani njalo kulungiswe lodaba lwabantwana babo abathathu.
Abantu abanengi bacabangela ukuba inotho le bayithola ngesikhathi kusabusa umuyi uMugabe, owabulawa yisifo semvukuzane esesuswe esikhundleni libutho elalibambisana loMongameli Emmerson Mnangagwa labanye bakhe.
Sokuleminye njalo imibuzo emayelana lomhlabathi owathathelwa abamhlophe. Bayabuza abantu ukuba umhlabathi lo wabelwa njani inkokheli yebandla leZanu PF.
Bathi kukhanya engani abanye babo balamapulazi amanengi okumangalisayo.
UMnu. Joseph Tshuma, okudale leCentral Committee kubandla leZanu PF, uthi kuyamangalisa ukuba ababili laba balenotho enengi kangaka, ikakhulu amapulazi abawadinga ngamehlo abomvu.
UNkosazana Ellen Shiriyedenga laye ubambe owangaphansi esithi kumele uSimba Chikore lomkakhe bevezele uzulu ukuba bawathatha ngaphi amapulazi amanengi kangaka kanye lezindlu lezi.