BULAWAYO - EleZimbabwe limanyene lamanye amazwe womhlaba jikelele ngoLwesithathu ekunanzenzi usuku lweWorld Press Freedom Day (WPFD) ngesikhathi intathelizindaba zibhekane lendaba zamanga ezimemetheka enkundleni zokuxhumana ezitshiyeneyo.
Emizameni yokumelana lodubo lolu, inhlanganiso yeAfrica Check imanyane leU.S. State Department baqhube imfundiso yokuhlomisa intathelizandaba ukuthi bahluze okungamanga lokuliqiniso bengaka lobi izindaba.
Ukhokheli weZimbabwe National Editors Forum, uNjabulo Ncube, uthi kuyadanisa ukuba bananza ilanga leWPFD ukuhlukuluzwa kwabesifazana kusiya kukhula ezweni.
"Abesilisa abazintathelizindaba bakhona abahlukuluza abesifazana ngakho siphakathi kwalo loludaba amabizo silawo okutsho ukuthi lowo ozafumanwa ehlukuluza abesifazana ikakhulu ngezocansi uzabotshwa axotshwe lomsebenzi."
UNkosazana Tanaka Murerwa, intathelizindaba yeCITES, uthi zinengi inhlupho ababhekana lazo uma besemsebenzini.
"Sikhangelele ukuba uhulumende aqondisise indlela asiphatha ngayo ngoba uyathola ukuthi labo abasebenzela uhulumende baphathwa ngcono kulabazimeleyo njalo bayaxotshwa kumihlangano eminengi kahulumende."
UMnu. Lenox Mhlanga, isiphathamandla seVoluntary Media Council, uthi bakhathazekile ngokuhlukuluzwa kwentathelizindaba ezisanda kuqala ukuloba.
"Kulusizi ukuthi njenge VMCZ sithola imibiko evela kwabasakhulayo abaqala umsebenzi wokuloba yibo inengi labo elibanjwa kubi ngabesilisa abasebenza labo besephula amalungelo abo kuhlanganisa lawecansi."
Intathelizindaba esingumqondisi wenhlanganiso eyeFact Check Zimbabwe, uLifaqane Nare,, uthi benza konke okusemandleni abo ukufundisa wonke muntu ezweni ngokuqakatheka kweFact Check ezindabeni eziphumayo elizweni.
"Siqhubekela phambili sifundisa inengi ngohlelo lw eFact Checking kuhlanganisa leNtathelizindaba uhlupho olukhona yikuthi amankampani amanengi athapha indaba awala mpahla eyeneleyo yokuthi iNtathelizindaba ziyisebenzise uyathola ukuthi njengalesi isikhathi sisiya ekhethweni kuthiwe iNtathelizindaba ihambe ngemota kalowo oyabe efuna ukuvotelwa okusuka kubenzima phambili."
UMphathintambo obona ngezokukhutshwa kwemibiko uNkosikazi Monica Mustwangwa kunkulumo yakhe yokunanza ilanga leWPFD uchaze ukuba uhulumende wenza konke okusemandleni akhe ukunanza malungelo entathelizindaba ezweni ethi sekulemithetho ekhona ekhangela lokhu. Wakhuthaza imisakazo lamaphephandaba ezweni ukuthi ehlukane lokukhupha imibiko engamanga.
EZimbabwe intathelizindaba zikhala ngokuvalwa mahlayana kwamagagasi lemithetho ebancindezelayo ebalisa eyeAccess to Information and protection of Privacy Act owesulwa kwadalwa iFreedom of Information Act. Ezweni okwamanje kulentathelizindaba ezimbalwa ezabotshwa ngaphansi komthetho weCriminal Law Codification and Reform Act ehambisana leCyber and Data Protection Act lapho okwabotshwa intathelizindaba ezinjengo-Hopewell Chin’ono, Jeffrey Moyo, ukuthunjwa kukaTawanda Muchehiwa labanye.
Abe-Misa-Zimbabwe bathi ngomnyaka ka2018 kwabotshwa intathelizindaba ezingmatshumi amathathu lambili-32 kwathi ngomnyaka odlule kwabotshwa ezingamatshumi amathathu lasithupha-36.
Abenhlanganiso eye Reporter Without Borders babika ukuba ele Zimbabwe ngelinye lamazwe akhokhelayo ekwephuleni ilungelo intathelizindaba lonyaka likusibanga sokulikhulu lamatshumi aphezu kwamabili-126, phakathi kwamazwe alikhulu lamatshumi athobaminwemibili-180.
Intathelizindaba ezinengi kulezi insuku zikhala ngokuhlukuluzwa inengi lazo liyaxotshwa emikhosini kahulumende zingela cala kumbe ukubazelwa amacala. Okwamanje uhulumende uphakathi kokuloba imithetho ebekela intathelizindaba imigoqo, egoqela iMedia Practitioners Bill, Protection of Personal Information Bill leminye.
Lonyaka i-WPFD inanzwa phansi kwendikimba ethi "Shaping a Future of Rights:Freedom of Expression as a Driver for all other Human Rights kuthi eZimbabwe inanzwa ngaphansi kwendikimba ethi "Freedom of Expression is a Public: Pivotal to the Enjoyment of other Rights."