HARARE - UMnu. Job Sikhala, otholakale elecala lokuphazamisa abomthetho, uhlawuliswe ngumantshi ngoLwesithathu amakhulu ayisithupha amadola eMelika – US$600.
Umantshi uNkosikazi Marehwanazvo Gofa utshele idale ukuba lobanje uSikhala ubephikisa icala leli, ubufakazi bakhe bebungela ntshukuntshu.
Iqgwetha lika Sikhala, uMnu. Harrison Nkomo, uthi kusobala ukuba uSikhala kalacala. Uthe bazaphikisa isigwebo lesi emthethwandaba weHigh Court.
“Sizaphikisa isigwebo lesi ngoba vele siyazi ukuba akula cala alenzayo. Siyathemba ukuba kalacala."
USikhala, omelet iZengeza West edale lephalamende ekubandla leCitizens Coalition for Change utshele umthethwandaba ukuba uhulumende kaMongameli Emmerson Mnangagwa umthwalise nzima ngenxa yokuthi usekela ibandla eliphikisayo.
USikhala ubotshwe nyakenye ngemva kokuba efake umfanekiso owevideo enkundleni yebulenjini esithi umuyi uNkosazana Moreblessing Ali oweChitungwiza, owatholakala efile eNyatsime, wabulawa ngabasekeli bebandla leZANUPF.
Abatshutshisi batshele idale ukuba uSikhala wakhuluma lokhu esazi mhlophe ukuba udaba lolu lusacutshungulwa ngamapholisa, abathi lokhu kwaphambanisa ukusebenza kwabo.
Umsekeli we sikhulumeli seCCC, uMnu. Gift Ostallos Siziba, uthi siyethusa isigwebo lesi.
“Utholakale elecala elokuba uphikisana lebandla elibusayo. Akusondaba esiyikhangeleyo. Silokuphiksa ngoba siyakukhetho okumele lwenziwe okusemthethweni.”
Lokhu kusekelwe yingcitshi ecubungula ezombusazwe, uMnu Tjenesani Ntungakwa.
“Ukuthi utholakale ele cala kutshengisa ukuba uhulumende usebenzi umthetho ukujezisi abantu makhaza. Ujezisa abantu abenza ezombusazwe.”
Lokhu kuza ngemva kokuba uSikhala walandula ivideo eyalethwa emthethwandaba ngesikhathi ethoniniswa esithi ivideo leyi yayiphekaphekiwe.
USikhala ulamanye amicala amathathu azakuza emthethwandaba agoqela ukutshotshozela ukuba uhulumende akhitshwe lokutshotshozela udlakela.