HARARE - Inengi labasakhulayo eZimbabwe lithi liyahawula okwamagama, kubangelwa ngumumo omubi womnotho welizwe.
Okudanisayo bathi sebelahlekelwe lithemba lokuthi lumumo ungalungiseka esikhathini esifitshane esilandelayo.
Abasakhulayo abanengi bathi bezwa seziyinganekwane, ukuthi eleZimbabwe lake laba mnandi, uluju sibili, ngoba bona sebekhulela ebuyangeni obukhulu.
Loba bekhona ontanga abalutshwane abathi kuyaphileka kwelakithi, inengi lithi impilo yanamuhla, efana laleyo abazalelwe kiyo, yikukhama ilitshe ukuthi liphume amanzi.
Osakhulayo, njelo engumlimi eChegutu, uRumbidzai Matonga, uthi umi manzonzo umumo elizweni.
“Abasebenza kudala yibo abaphila impilo engcono. Thina siyahlupheka njengabatsha. Uthola umuntu oleDegree esebenza umsebenzi lapho ahola iUS$250. Kayikwani lutho imali enje. Abafundayo bafika kuForm 4, ngesinye isikhathi baphila impilo engcono ngoba sebejwayele ukuzidingela imali ngokubamba lokhu lalokhuyana. Abadala bakhona kabafuni kutshiyela abasakhulayo amathuba emisebenzini, bafuna ukufela khona."
Lokhu kugcizelelwa nguMnu. Eric Gono, eyinye yenkokheli zabatsha kubandla leCitizens Coalition for Change.
"Phose abasakhulayo bonke abazake beyikholise iZimbabwe. Amathuba lemisebenzi akukho, lanxa befundile abatsha. Okuncane abakwenzayo, imali yakhona kayithengi lutho- kasila zimota, kasila zindlu njengabasakhulayo bamanye amazwe. Kodwa silethemba lokuthi njoba sisiya ekhethweni, imbangela yenhlupheko zethu siyayazi. Abatsha kumele bevote besazi ukuthi ivoti leyi ibambe impilo zabo sisiya phambili."
Ingcwethi ecubungula ezombusazwe, njalo esebenza kunhlanganiso yeZimbabwe Democracy Institute, uMnu. Bekezela Gumbo, yena ukhuluma phezu kobunzima bempilo obubhekane labatsha.
"Abantu abatsha sebephelelwe lithemba. Abanengi sebesenza okwezidakamizwa. Abanye bayabulalana esikorokozeni.Abanengi bayachapha besiya phandle kwelizwe besiyatshontsha."
Kodwa isikhulumeli sabatsha kuZanu PF esabelweni seBulawayo, uMnu. Addington Mpofu, uthi ngamanga aluhlaza tshoko, ukuthi abatsha bakuleli abakayiboni impilo eloluju lobisi elizweni labo.
"Namuhla ungabuza ukuthi ngobani abasetshaya umsebenzi kwezokwemba; abathenga lokuthengisa kwamanye amazwe; abakubhizumusi lokuhambisa impahla; abalimayo- uzathola kulabatsha abanengi. Abatsha siyaziqhenya ngoba lathi sesingena endaweni ezazigcwele abadala. Kodwa lokhu kufuna abasebenzayo, hatshi amavila. Elakusasa lethu lile themba, ikakhulu singakhangela iVision 2030."
Omela amalungelo abasakhulayo, njalo eyinkhokheli yenhlanganiso yabantwana bamaqhawe elizwe, eye Children of National Heroes, uBelinda Cele, umntaka kamuyi uGeneral Cephas Cele, uthi abatsha kumele bezimisele ukuphakamisa ilizwe labo.
"Amanye amaphutha asenziwa ngabadala bethu, ngibona ingani sokulokukhula lokudinwa. Nxa abazali belokuphambanisa, kukithi abatsha ukuthi sikulungise. Kumele sibe lobundlelwano labo, sibe kwazi imibono yabo, ngoba yibo abavela khatshana lelizwe. Umkhonomi lowu usufuna thina esafundayo. Uthe usufundile ntanga waseZimbabwe, wawusuyenzani? Masibambeni imisebenzi yezadla siphakamise isizwe."
Umphathintambo wogatsha lwezesebenzi zikahulumende lenhlalakahle kazulu, uMnu. Paul Mavima, uthi sikhuluma nje, umnotho welizwe uya uthuthuka, njalo imisebenzi layo isisanda edalwayo.
"Abasakhulayo kumele bagijime bethathe amathuba, ngoba labo abathatha inyathelo lokudinga ukuzithuthukisa, yibo abazahlawulwa. Ikhona imisebenzi kozokwemba, kwezekwethekelelwa kwelizwe, kwezokulima, kusiya. Khathesi sibona abanye ontanga bengena endaweni lezi besenza imali. Lokhu kkutshengisa ukuthi ithemba likhona, lifuna abalandela umbono kamongameli wokwakha ilizwe, ilitshe phezu kwelitshe. Kodwa bakhona abamelele ukunikwa imisebenzi bezihlalele nje, laba bazakhala ezimathonsi."
Ingcwethi ecubungula ezombusazwe, njalo esebenza kunhlanganiso yeZimbabwe Democracy Institute, umnumzana Bekezela Gumbo uthi elakusasa labatsha lisezandleni zabo.
"Abatsha laba badinga abukhokheli bombusazwe obulakho ukufaka izifiso zabatsha pambili, bengabe bevela kubandla elibusayo kumbe eliphikisayo. Kumele bafundiswe ukuba ezombusazwe ziqhutshwa njani, okubuya kubavule ingqondo ukubana bafuna inkokheli ezinjani. Lalabo abatsha abazangena edale lephalamende, kumele besebenze ukuvuselela iPolitical consciousness yabanye babo ukuze bebe lethemba."
Ezinye Ingcwethi ezicubungula indaba zabatsha zithi uhulumende usekhulise intsha engakwazi lokuthi iya ngaphi ivela ngaphi, ngoba kayila misebenzi, kayila mali njalo kayila themba. Izikhathi ezinengi babonakala becela yonke into- igwai, iphepha lomlilo konke.