WASHINGTON - EleZimbabwe selihlenge izizalwane zalo ezingamatshumi ayisithupha lantathu – 63 ebezikwele Sudan okulempi yomvukela, osokutshabalale abantu abedlula amakhulu amahlanu lamatshumi amabili – 528.
Iphephandaba leHerald libika ukuba sekusele abadabuka eZimbabwe abathathu abafisa ukubuyela ekhaya. Abathathu laba kubikwa ukuba ngabantu abasebenza imisebenzi etshiyeneyo.
Kusenjalo, abezindaba abeReuters babika ukuba kulabantu abedlula inkulungwane ezine lengxenye – 4,599 asebelimele empini le, okulwisana uGeneral Abdel Fattah al-Burhan, okhokhela ibutho likahulumende, loGeneral Mohamed Hamdan Dagalo, okucele leRapid Support Forces.
Ababili laba bebethembise ukuhlonipha isinqumo sabo abasenze ngoMgqibelo esokumisa impi le okwesikhatshana kusaxoxiswana lamanye amazwe ngokukhumisana umlotha.
UMnu. Martin Griffiths, okuhlangothi lwenhlanganiso yamazwe omhlaba wonke jikelele eyeUnited Nations Humanitarian Affairs and Emergency Relief, uthi kuyethusa okwenzakala elizweni leli ngoba impi le iqhubekela phambili.
Uthi kumele amazwe wonke ezame ukukhulumisana labakhokheli bamacele amabili alwisanayo ngoba abantu bayafa okumangalisayo eSudan.
Kubikwa ukuba kulabasebenzela inhlanganiso ezizimeleyo asebebulewe kulelolizwe.
Ukuze sihlaziye ukuhlengwa kwabadabuka eZimbabwe labanye abafika inkulungwane ezingamatshumi amahlanu – 50,000 kwele Sudan, uGibbs Dube weStudio 7 uxoxe loMfundisi Useni Sibanda, umgcinisihlalo wenhlanganiso yeZimbabwe Christian Alliance, oncome okwenziwe nguhulumende weZimbabwe.