WASHINGTON - Bayakhala abantu kulandela imibiko ethi uhulumende usethengele uMongameli Emmerson Mnangagwa indizamtshina entsha ebize izigidi ezingamatshumi amahlanu lane zamadolar eMelika – US$54 million.
Abezindaba abe-ZimLive babika ukuba indizamtshina le ilesikhatshana yathengwa. UMnangagwa kubikwa ukuba uyisebenzise esiye emhlanganweni we-Transform Africa ngeviki ephelileyo.
Kubikwa ukuba uyisebenzise njalo esiya embukisweni wamabhizimusi owe-Zimbabwe International Trade Fair koBulawayo.
UMnu. Fortune Mlalazi, okubandla leCCC, uthi kuyethusa okwenziwa nguMnangagwa.
Kodwa uMnu. Tafadzwa Mugwadi, obona ngokwethulwa kwemibiko kubandla le-Zanu PF, uthi abantu bakhuluma abangakwaziyo.
“Lani alikwazi ukuba yanikwa umongameli kumbe yathengwa. Isikhulumeli sikamongameli uMnu. George Charamba nguye ongakhuluma ngokugcweleyo ngodaba lolu. Sijeyele ukubona inkokheli yakwamanye amazwe isebenzisa indizamtshina emihlanganweni etshiyeneyo. Asithi yebo ithenginge indizamtshina, kambe abantu bebemelele ukubona umongameli etshova ibhayisikili emoyeni? Sikujayele konke lokhu.
“Sike sabona abezindaba abeAl Jzeera bebukisa idocumentary yabo bezama ukugcolisa umongameli lemuli yakhe. Sikujayele konke lokhu. Akusimangalisi ngitsho lakancane. Banengi abakwenzayo besenzela ukugenqula uhulumende. Ngingathaba ukubona umongameli esebenzisa indizamtshina esiyakwenza akuthunywa ngabantu beZimbabwe. Konke lokhu kuzamenza athakazelelwa ngabantu eZimbabwe.”