Abesigodlo sommeli we Melika eZimbabwe bethule umbiko besola ukusetshenziswa kwemithethwandaba ukuhlukuluza labo abalemibono ehlukile lekahulumende, ngokubabopha mahlayana, abanye bevalelwa okwesikhathi eside kanye lokugwetshwa emacaleni asobala ukuthi akadingi isigwebo esilukhuni kangako.
Abe USA Embassy eHarare, bathi kulilungelo lomuntu wonke ukubuthana lokutshengisela ngokuthula kungakhathalekile ukuthi ngowebandla liphi lezombusazwe.
Lumbiko uphuma ngemva kokugwetshwa ukuhlala ejele okweminyaka emine komkhokheli webandla le transform zimbabwe, uMnu. Jacob Ngarivhume NgoLwesihlanu. U-Ngarivhume utholakale elecala lokutshotshozela udlakela ngokukhuthaza uzulu ukuthi asukume atshengisele esola isimo elizweni ngomnyaka ka 2020.
Kunje ummeli weZengeza West edale lephalamende, uMnu Job Sikhala, owebandla leCCC, lokhe evalelwe eRemand okwenyanga ezedlula ezilitshumi, engavunyelwa khona ukuhlawula isibambiso seBail ukuze athoniswe evela emzini wakhe lanxa esefaka izicelo ezinengi nengi.