Amalunga edale lephalamende akwele Bhilithani aweAll Parliamentary Party Group Zimbabwe sebelobele ugatsha olubona ngobudlelwano lamanye amazwe womhlaba besola ukunxuswa kuka Mongameli Emmerson Mnangagwa ekugcotshweni kweNkosi uCharles II.
Bathi uMnangagwa wephula amalungelo oluntu kungakho kumele angavunyelwa ukuzehlangana lenkokheli yamazwe womhlaba emkhosini omkhulu kangaka.
Amalunga la athi ukuqansa kwezehlakalo zodlakela lokuhlukunyezwa kwabantu besephulelwa amalungelo abo okwenzakala eZimbabwe kwenza uMongameli Mnangagwa engamukeleki.
Lithe ukuhlala ejele kwesiphathamandla seCitizens Coalition for Change, uMnu. Job Sikhala. okwesikhathi eside kangak, kutshengisa ukuba isimo esise Zimbabwe kasimanga kuhle ikakhulu ngakhoke ukunxusa uMnangagwa eleUK liyabe selamukela ukuhlukunyezwa kuka zulu we Zimbabwe.
Isikhulumeli seCitizens Coalition for Change, uMnu. Gift Ostallos Siziba, uthi kusobala ukuba uMnangagwa kamukelwa ngamanye amazwe womhlaba.
“Lokhu kuveza ukuba kwele Zimbabwe kulodubo ngamalungelo abantu. Uhulumende uncindezela abantu. Amabandla aphikisayo, abezinkozo lentatheli bonke kabahlonitshwa. Konke lokhu kwenziwa kahulu ngesikhathi sokhetho, yikho bemisile uMongameli.”
UMnu. Msongelwa Ndlovu, owebandla leZAPU, ulombono ofanayo.
“Umahluko phakathi kweNkosi yeNgilandi loMnangagwa kasiwuboni ngoba bonke bobabili bancedisa ukubhuqa isizwe sika Mthwakazi. Asilani lokuthi bazondelani. Lokhu okokuthi kulabantu abathi engabuyi bonke zimbila zantabanye.”
Imizamo yokuthola imbono kahulumende yehlule abogatsha lokudlelana lamazwe besithi abakhulumi ngaloludaba kuthi isikhulumeli sika hulumende, uMnu. Nick Mangwan,a ubengasabeli ucingo.
Kodwa Ilunga leZANU PF Central Committee, uMnu. Mabutho Moyo, uthi uhulumende ka Mnangagwa uzama ngazo zonke indlela ukulungisa ubedlelwano lamanye amazwe.
“Umkhankaso ka Mongameli owe reengagement uyamukelwa ngabantu bonke. Ilizwe le Bhilitani lasihlukumeza. Umongameli uthi asisebenzi Labantu bonke asilani lokuba ilizwe ngelangaphi loba ngaphi. Sesifuna ukuba sithole esikufunayo singasali sikhala”
Ingcitshi kwezombusazwe, uMnu. Tjenesani Ntungakwa, uthi isehlakalo lesi siveza ukuba kusese kunengi ele Zimbabwe okumele likwenze ukuze lithenjwe ngamazwe womhlaba.
“Inhlangothi zombuso wamakhiwa kazizwanani lohulumende kaMnangagwa lokhu kutshengisa ukuba asiyi ndawo.”
Incwadi le ilotshwe ngumgcinisihlalo we qula le United Kingdom All Parliamentary Party Group, uMnu. Nav Mishra, esekwela nguLord Oates.