BULAWAYO - Uqala ngoLwesibili umbukiso omkhulu wamabhizimusi oweZimbabwe International Trade Fair, ozavulwa okusemthethweni yingonyama yaMaSwati, uKing Mswati III.
Abazabukisa impahla etshiyeneyo sebelungisile indawo zokutshengisa uzulu abalakho lonyaka eZimbabwe International Trade Fair Showgrounds. Umgcinisihlalo wenkampani yeZITF, uMnu. Busisa Moyo, uthi asekuzinga eliphezulu amalungiselelo ombukiso lo ozavulwa okusemthethweni nguMswati III.
Isikhulumeli seZimbabwe Tourism Authority koBulawayo, uNkosikazi Nomvuyo Mathonsi, uthi zonke izindlu zokuzilibazi zesigcwele koBulawayo.
UNkosikazi Mathonsi uqhubekele phambili esithi basebenzelana lekhansili yakoBulawayo leZESA njalo uBulawayo uzabe elamanzi lamandla kagesti ngesikhathi sombukiso weZITF lonyaka.
UMnu. Mthokozizi Mthunzi, olungisa indawo zokubukisa enkundleni yamabhizimusi eZITF, uthi sebelungiselele umbukiso lo.
Okubhizimusi lokuthwala uzulu koBulawayo, uMnu. Meluleki Mlotshwa, uthi ibhizimusi lisasephansi okwamanje kodwa bakhangelele ukuba lizakhuphuka kusukela kusasa.
UMnu. Nkosilathi Khumalo, okubhizimusi lokuthengisa impahla koBulawayo, uvumelane loMlotshwa esithi ibhizimusi lisasephansi kakhulu.
Umbukiso wamabhizimusi oweZITF walonyaka uqhutshwa phansi kwesihloko esithi "Transformative Innovation, Global Competitiveness". Amazwe angamatshumi amabili lanye azabukisa lonyaka lamankampani adlula kancane amakhulu amahlanu - 533 azabe esemagcekeni eZimbabwe International Trade Fair showgrounds.
Abaphathintambo beZITF bathi umbukiso walonyaka ukhule ngokuyisilinganiso sokungamatshumi amathathu ekhulwini - 30% ngemva kokwehla ngenxa yobhubhane lweCOVID-19.
IZITF imanyene labosimabhizimusi, ikhangelelwe ngoLwesithathu ukuba izaqhuba umhlangano ozangenwa ngumsekeli kaMongameli uMnu. Constantino Chiwenga labakumanyano we-European Union labanye. NgoLwesine kuzakuba lomhlangano weConnect Africa Symposium, ozangenwa njalo nguMnu. Chiwenga labeUNDP, E-U lobosomabhizimusi bomhlaba wonke jikelele.
Abasakhulayo labo balemihlangano yabo ephansi kombukiso omncane kulowe ZITF, owe-Scholastica, ozaqhutshwa ngumqondisi weNational University of Science and Technology, uSikhwicamfundo Mqhele Dlodlo.
Kusenjalo, EleBotswana lizathumela amakampani alitshumi lanhlanu - 50 ukuyaphatheka kumbikiso weZimbabwe International Trade Fair.