HARARE - UMnu. Nelson Chamisa nguye yedwa okhethwe libandla leCitizens Coalition for Change ukuba ancintise kukhetho lukamongameli oluzakwenziwa lonyaka. Kukhangelelwe ukuba uzangqikilana loMongameli Emmerson Mnangagwa labanye kukhetho olulakho ukuqhutshwa ngoNtulikazi kumbe ngoNcwabakazi.
Lokhu kwethulwe ngoLwesine emhlanganweni owenziwe liqula leCitizens Candidates Independent Selection Panel, elamukele amagama abakhethwe nguzulu ezabelweni zonke.
Kubikwa ukuba akula omunye okhethwe nguzulu ukuba angene kukhetho lukamongameli. Bekulemibiko ethi uMnu. Tendai Biti ubekhethwe ngesinye isabelo ukuba ancintise kukhetho lolu kodwa ibandla leCCC liyakuphika lokhu.
Kasenelisanga ukukhuluma loBiti ngodaba lolu ngoba ubengaphenduli umakhalekhukhwini. Isikhulumeli sequla leCitizens Candidates Independent Selection Panel, uMnu. Shepherd Ngandu, uthi uChamisa ukhethwe ngabantu abanengi abaphatheke kuhlelo lokudinga abazancintisa kukhetho oluzayo.
UNgandu uthi uhlelo lwakuqala olokudinga abazancintisa kukhetho aluvezanga amagama abanqobileyo. Uthi sebezaqala ukuhlolisisa amagama wonke afakwe nguzulu.
Umsekeli wesikhulumeli sebandla leli, uMnu. Gift Ostallos Siziba, uthi labo asebejabula ngokuba lamabizo afakwe kusigaba sakuqala abame kancane ukujabula ngoba kusakude phambili.
USiziba uthi uhlelo lolu luzagqitshwa ngemva kwamaviki amabili nxa amagama avela kuzulu esekhangelisisiwe. Uthi abazakukhangela kugoqela imbali, isimo somuntu, lokho okwafundelwa ngulowo ofuna ukuncintisa njalo lalakho asekwenzele indawo afuna ukuncintisa khona.
Uthi uhlelo lolu lungcono kulohlelo lwama primaries ngoba lukhangelisisa okunengi. Kulabantu abafika inkulungwane ezimbili – 2,000 abafisa ukuba yingxenye yalabo abazancintisa kukhetho lwabameli bedale lephalamende njalo kulabazinkulungwane ezingamatshumi amathathu – 30,000 abafuna ukungena kukhetho lwamakhansili. Ilunga leZANU PF Central Committee, uMnu. Mabutho Moyo, uthi kusobala ukuba ibandla leCCC alilandeli intando kazulu ngendlela elikhetha ngayo abazancintisa kukhetho oluzayo.
Ingcwethi kwezombusazwe esebenza eUniversity of Zimbabwe, uMnu. Malachai Mlotshwa, uthi iyasolisa indlela esetshenziswa libandla leCCC eyokudinga abazancintisa kukhetho oluzayo.
Amalunga ebandla leCCC axabene kwenzinye izigaba ebanga indlela okukhethwe ngayo abazangena kukhetho olukhulu oluzakwenziwa lonyaka eZimbabwe. Bamelele elizweni lonke jikelele ukubona ukuba kuzahamba njani kuhlelo lwe-Consensus Candidates Selection olwenziwa libandla leli.