WASHINGTON - Abantu abanengi bamelele ngamehlo abomvu ihlandla lesine lefilimu yeAl Jazeera eveza ubukhohlakali obenziwa ngabacatshangelwa ukuba badlelana loMongameli Emmerson Mnangagwa.
Kukhangelelwe ukuba ihlandla leli lizakwethulelwa uzulu kungakapheli iviki.
Amahlandla amathathu atshengiswa uzulu aweGold Mafia aveze ubukhohlakali obumangalisayo okuthiwa benziwa nguMnu. Eubert Angel, omele iZimbabwe jikelele emhlabeni wonke jikelele, uSimon Rudland, Ewan McMillan, Kamlesh Pattni, Cleopas Chidodo, Fredrick Kunaka, Henrieta Rushwaya, Ricki Doolan, Allister Mathias, Mehluleli Dube, David Chirozvi labanye.
Abanye babo sebevalelwe ama bank accounts libhanga elikhulu lelizwe eleReserve Bank of Zimbabwe. Akwaziwa ukuba ihlandla elilandelayo limumetheni ngobukhohlakali obuvezwe ngabezindaba abeAl Jazeera.
Okwamanje kulabanye abantu abathi bekumele kuvinjwe lama bank accounts kaRushwaya, isihlobo sika Mnangagwa.
Isikhulumeli samapholisa, uAssistant Commissioner Paul Nyathi, uthi sebehlolisisa labo abacatshangelwa ukuba bathengisa igolide ngudlu. UMnu. Prince Dubeko Sibanda, okubandla leCCC, utshele iStudio 7 ukuthi amapholisa adlala ngozulu.
UMnu. Freedom Murechu, okuhlangothi lwabatsha kubandla leZanu PF, othi ukungabotshwa kwabanye abantu kuveza ukuthi akulanto embi eyenziwe ngabanye abaphume ku-documentary series yeAl Jazeera.