Uhulumende weZimbabwe uthi ukhathazekile kakhulu ngemibiko yomfanekiso weDocumentary, ephunyiswa kumsakazo kamabonakude owe Al Jazeera esithi uselaye inhlanganiso zakhe ukuba ziqhube uphenyo ukuze labo abephula umthetho babotshwe.
Lokhu kwethulwe ngumphathintambo obona ngokukhitshwa kwemibiko uNkosikazi Monica Mutsvangwa ekhuluma emhlanganweni lentathelizindaba e Harare namhlanje.
UNkosikazi Mutsvangwa uthe uhulumende kasekeli inkohlakalo eyenziwa ngabantu abatshontsha igolide.
“Uhulumende usebone i-documentary ethi Gold Mafia ephuma kumsakazo ethi kutshontshwa igolide eZimbabwe. Lokhu okukhulunywayo siyakhathazeka ngakho”
Uqhubeke esithi uhulumende uzabopha labo abacatshangelwa ukuba balecala.
“Wonke umuntu ozabanjwa esenza inkohlakalo uzabotshwa. Sizalandela imthetho yonke egoqela ukuthengiswa kwegolide”
UMutsvangwa uthe uhulumende uzimisele ukulandela imthetho yemhlabeni wonke yokuthengiswa kwe golide emhlabeni jikelele.
Kodwa ingcitshi ezicubungujla ezomnotho lezombusazwe zithi uhulumende kumele enze njengokutsho kwakhe ngoba udaba lolu lulakho ukuphazamisa isimo seZimbabwe emehlweni amanye amazwe omhlaba.
Umsekeli wesikhulumeli se-Citizens Coalition for Change (CCC) uMnu. Gift Siziba uthi uhulumende we ZANU PF kenelisi ukuqeda inkohlakalo.
“Njengebandla siyakhathazeka ukuba umnotho welizwe wala utshontshwa ngabantu abazakalayo. Asikholwa ukuba balakho ukulungisa udaba lolu”
Lokhu kusekelwe ngenye ingcitshi ecubungula ezombusazwe, uMnu Msongelwa Ndlovu owebandla le ZAPU.
“Akusimangalisi lokhu ngoba nxa sikhangela ngabe balesiqiniseko sokuqeda lokhu ngabe sebakwenza kudala. Sithemba bazabopha abantu njengokutsho kwabo”
IDocumentary le, yethulwa ikuzigaba ezine, esitshiye abanengi bebambe owangaphansi ngokuhuquluzwa langokutshontshwa okwenziwa umnotho welizwe.
I-Al Jazeera yethule isigaba sesibili ngeviki edluleyo, esibonise indlela yokuthi igolide likhutshwa njani elizweni ngokungekho emthethweni lithunyelwe kwamanye amazwe, okubikwa kusaziwa langezinye iziphathamandla zikahulumende lezeZanu PF okugoqela umongameli welizwe.
