HARARE - UMongameli Emmerson Mnangagwa uthi kumele kubotshwe bonke abaphatheka kumkhuba wenkohlakalo njalo laba thengisa izidakamizwa.
UMnangagwa wethule umbiko lo embuthanweni wokuvulwa komthethwandaba kaMantshi endaweni yeEpworth, eHarare. Uthe okwenza ukuba izigila mkhuba ziyande yikuba kwesinye isikhathi kaziphiwa izigwebo ezilingana lama cala azo.
“Kasiqhubekana silemadale ethu alwisana le nkohlakalo. Ngithabile ngisizwa uMahluli ekhuluma ngenkohlakalo lalabo abathatha izidakamizwa.”
Inkuthazo ka Mnangagwa iza ngesikhathi kuphume uhlelo lwemifanekiso yefilimu eyeDocumentary, elezigaba ezine emsakazweni kamabonakude owe Al Jazeera eveza uhuquluzwa ko mnotho we Zimbabwe ikakhulu amatshe aligugu awegolide athengiswa ngemali enengi kwamanye amazwe kodwa inzuzo yalumsebenzi ingabuyeli esikhwameni sikahulumende kodwa inothisa abantu abalutshwana abasezikhudnleni zobukhokheli.
Kodwa ingcitshi zezombusazwe zithi kunengi angakwenza uMnangagwa ukuze atshengise ukuba ngempela uzimisele ukulwisana le nkohlakalo. Omunye walezi ngcitshi ngu Mnu Liberty Dube.
“Kumele uhulumende abone ukuba kuba lemithethi ebopha labo abatshontshayo kulokuba bebotshwe bebeselwe ezindlini zabo khonapho khonapho.”
Esinye isakhamuzi se Harare, uMnu. Peter Phiri, ngomunye wabamukele ngenjabulo ukuvulwa komthethwandaba waseEpworth namhlanje.
“Kuyajabulisa ngoba asisayi eHarare edolobheni. Amacala wonke azathoniswa eduze lathi okuyinto esijabulisayo.”
UMongameli uthi njalo ukuvulwa komthethwandaba owe Epworth kudalwe yikuba sebenanzelele ukuthi zinlutshwane indawo ezithoniswa amacala e Zimbabwe ngakhoke uhulumende wakhe uzakusa imithethwandaba le, ebantwini ngokuvula eminengi elizweni lonke.
“Ukuvulwa kwecourt ye-Epworth le yikuqala kwethu ukuthi sivule amanye amadale afanana lalawa. Sizavula eCowdray park, eSakubva, eMucheke lase Budiriro.”
Abohlangothi olweJudicial Services Commission bathi baqoqa ukwakha eminye imithethwandaba endaweni ezehlukeneyo zelizwe ezifana lasemizini egoqela iCowdray Park koBulawayo, iMkoba eseGweru, eSakubva laseDangamvura eMutare, eMabvuku, eGlen Norah, eHarare njengendlela yokuthi imithethwanda ifenyelelwe ngabanengi ukuba bengabhekani lendleko enkulu yokuhambisa besiya emithethwandaba.