GWANDA SOUTH - Abesifazana beBethel, eGwanda South, bathi indlala sebeyizwela kubomakhelwane ngoba sebesenelisa ukuziphilisa ngenzuzo abayithola esivandeni abasakha bencediswa ngenye inhlanganiso ezimeleyo.
UNkosikazi Angela Dube ngomunye wezakhamizi zeBethel ezingamatshumi amane lambili, 42, ezabamba iqhaza zasungula isivande seProgressive Garden ngenjongo yokuthuthukisa impilo zazo zincediswa yinhlanganiso yeHand in Hand.
UMaDube uthi kusukela ngo2019 beqalisa ukulima kulingadi ngokuthelezela, impilo zabo seziguquke zabangcono kakhulu ngoba sebethengisa izilimo zabo lezithelo.
"Thina omama beProgressive Garden izilimo zethu esilazo zinengi, silezihlahla, silembheda yethu yembhida, i-butternut lamatamatisi kathesi kunje silamalemon angu 1350 asemilile lama-guava, amapopo lama-grapes," kutsho uMaDube.
Intokozo yakhe labanye bakhe abalima kulesisivande ivele sobala ngoLwesithathu lapho abaqhube khona umcimbi wokuthakazelela ilanga labomama eleInternational Women’s Day, lona elinanzwe emhlabeni jikelele mhlaka 8 kulinyanga.
Omama laba babuthene bebukisa isivande sabo, beziqhenya kakhulu ngemisebenzi yabo.
UNkosikazi Getrude Ndlovu yena uthe, "Abantwana besikolo ngiyababhadalela, itshukela ngiyathenga, impuphu ngiyathenga angisakwazi lokhuyana ukubhoda ngemizi ngicela impuphu ngoba ngisebenza kulingadi ngizilimela siyabonga ingatsha zikahulumende leHand in Hand."
Ngaphandle kokulima, abesifazana laba batshayelana imali baphinde bayibolekise, kutsho uNkosikazi Maria Mkoni.
"Indaba esithi yiqogelela ukufusha imali, sifusha imali ngenyanga ngenyanga sifusha imali eyiR5O ngomuntu ngenyanga sibe sesiyibolekisana sizala emuntwini nxa ungathatha iR100 ibuya ileR20 phezulu ukuthi isincedise singomama."
Abesifazana laba bathi ukubambana kunhlelo zokuzithuthukisa kubapha amandla okuzimela lokuvikela amalungelo abo.
"Omama kudala sasingabonakali singabantu, omama babengavunyelwa ukufaka imbono kuthwe imbono yabo ayizwakali, sasiyeyiswa kakhulu," kutsho uNkosikazi Siceliwe Moyo, isakhamuzi seSengezane.
Umbuthano wabomama laba ungenwe yiziphathamandla zengatsha zikahulumende kanye lezenhlanganiso ezizimeleyo, ezigoqela inhlanganiso kahulumende weMelika ephathisa kakhulu uzulu weZimbabwe eyeDREAMS.
Isiphathamandla salinhlanganiso uNkosikazi Nicola Sibanda uthe balomlandu wokuphathisa abesifazana, ikakhulu kwezempilakahle.
"Thina njengenhlanganiso siqakathekisa amankazana angomama bakusasa sikhangele amankazana aleminyaka engu-10 kusiya ku-24 sibalethela isibhedlela lapho abangafinyeleli khona, siyanika amaphilisi aweFamily Planning siyanika amaphili okuzivikela umkhuhlane weHIV/AIDS," kutsho uMaSibanda.
Abekhomishini ebona ngokulinganiswa kwamathuba phakathi kwabesilisa labesifazana, eyeZimbabwe Gender Commission, bebekhona labo kulumbuthano bejabula ndawonye labomama besivande seProgressive Garden.
"Sibeka iso lokhozi kuzozonke izahluko ezikhona kuConstitution ezikhuluma ngobulili kumbe ngamathuba phakathi kwabomama labobaba, amankazana labafana, siyamkela izikhalazo zenu żonkę nxa uvalelwe ngoba ungumama uyinkazana kumbe ubaba,” kuchasise uMnu Dalubuhle Sibanda, umqondisi walikhomishini emhlubulweni weMaNdebeleni.
“Njengekomishini siyakhangelisisa kakhulu ukuthi kanti yiphi imgoqo eyenza ukuthi amankazana labafana bengabi lamathuba alinganayo."
Umqoqi wenhlelo zamabhizimusi kuhlanganiso yeHand in Hand uNkosikazi Unami Dube uthembise ukuthi bazaqhubeka besebenza labomama beProgressive Garden ngokubadingela imikambo emikhulu yokuthengisela izilimo zabo emadolobheni.
