Uhulumende uthi imali efika ibhiliyoni ele ngxenye yakuleli izakwabelwa ibandla le ZANU PF lele MDC Alliance phansi komthetho we Political Parties Finance Act. Ibandla elibusayo lizathola imali efika ibhiliyo elilodwa njalo ingxenye yalo izaphiwa ibandla le MDC elikhokhelwa ngu Mnu Douglas Mwonzora.
Isikhulumeli sebandla le MDC-T uMnu. Witness Dube uthi bekuvele kufanele ukuthi ibandla lakhe lithole imali le ngoba kusemthethweni.
Lokhu kusekelwe ngu Mnu. Mabutho Moyo owebandla le ZANU PF yena othi ibandla elifuna ukuthola limali le kumele likhankase lithole usekelo ngesikhathi sokhetho.
Kodwa ibandla le Citizens Coalition for Change liyakhonona lisithi ibandla le MDC T lathatha abameli balo, okugcizelelwa nguMnu. Discent Bajila oweCCC.
UMnu. Pride Mukono, ingcwethi ecubungula ezombusazwe uthi ukutholakala kwemali leyi kulakho ukuphazamisa amanye amabandla kodwa akusoze kuguqule kangako impumelo yokhetho.
Imali le iphiwa amabandla ayabe ethole okuhlanu ekhulwini 5% phakathi kwamavoti kukhetho lwama Harmonised elections.
UMongameli Mnangagwa ngeviki edluleyo wazise ukuba kuzabekwa ilanga lapho okuzavotwa khona, njalo ingcwethi ezicubungula ezombusazwe zithi ilanga leli lilakho ukuba ngo Ncwabakazi lonyaka.
