HARARE - Ibandla leZANU PF selimise ukhetho lwama primary elections obekumele lwenziwe ngoMgqibelo lisithi idale lePolitburo lizahlangana NgoMvulo ukuze liphume lesinqumo sokuthi ngobani abazancintisa kukhetho bemele lelo bandla.
UMnu. Mike Bimha utshele intathelizindaba eHarare ukuba bamise lolukhetho ngoba bekugcwele abantu abafisa ukumela ibandla leli kukhetho oluzayo.
“Siyathokoza njengebandla ukuba sithole amabizo amanengi abantu abafuna ukuphatheka kukhetho. Ugatsha lwezo mvikela kubandla soluqedile umsebenzi walo. Sikhangelele ukuthi uhlelo lolu luzaphela lusiwe kuPolitburo ngo Mvulo.”
Loba kunjalo, Icele lebandla leZanu PF elibizwa ngokuthi yiGeneration 40 lithi ukhetho lwama primary elections lumiswe ngabaphathintambo bebandla leli ngoba besebengene ezigabeni zonke eZimbabwe lapho abafake khona abatsha abanengi abafisa ukuncintisa ukuba ngabameli bedale lephalamende lamakhansila kukhetho oluzayo.
UMnu. Ntokozo Msipha, isikhulumeli senhlanganiso yeTyson Wabantu efisa ukuba uMnu. Saviour Kasukuwere oweGeneration 40 akhokhele ibandla leli, uthi kusobala ukuthi abadala abakubandla leZanu PF batshayana ngamakhanda ngokwenziwe yiG40.
Bathi bekusobala ukuba bazangenisa edale lephalamende lakumakhansili abasekela iG40, elamalunga aphose asuselwa amanqe ngomnyaka ka2017 kususwa oweyengumongameli umuyi uRobert Mugabe esikhundleni libutho libambisana loMnangagwa.
Isiphathamandla sebandla leli lithi kuliqiniso ukuba bakhona abacabanga ukuthi iG40 ibisingene ezikhundleni ezinengi zabafisa ukuncintisa kukhetho.
UBimha uqhubeke esithi ibandla lakhe kalisoze livumele udlakela esithi labo abenza udlakela bazakukhitshwa kuluhlu lwabamele bancintise bemmele ibandla.
Kodwa abanye abakubandla le ZANU PF abangathandanga ukuqanjwa ngamabizo bathi okubangele ukumiswa kokhetho lolu yikuba kulabantu abanengi abatsha abafuna ukuncintisa njalo balakho okunqoba labo amakhehla asehlale okweminyaka eminengi kuZANU PF.
Ibandla leli liyakulandula lokhu kodwa amabizo abanengi abafuna ukuncintisa kukhetho lolu akhanya engawabantu abatsha.
Omunye oncintisa kukhetho lolu nguMnu. Admire Masikati, ofuna ukumela iMzilikazi-Mpophoma, othi ulethemba lokuba uhlelo lolu luzahamba kuhle.
“Lokhu okwenzakalayo kwenza ukuba ibandla le ZANU PF liqhubekele phambili. Thina siyathemba konke okwenziwa libandla le ZANU PF ngoba uMongameli wethu nguye kuphela osikhokhelayo.”
Ilunga leCentral Committee yebandla leli, uMnu. Mabutho Moyo uthi ibandla leli liqoqeke kakhulu okokuthi lizanqoba kukhetho.
“Lokhu esikwenzayo kuyasitshengisa ukuba asisobandla elilenga emoyeni. Sikhokhelwa ngu Mongameli olenkokheli ekhethwe ngabantu sivela ebantwini.”Ingcwethi kwezombusazwe, uMnu. Elisha Gumbo, uthi ukuxokozela okuphakathi kwebandla leZANU PF kuveza ukuba abanengi sebefuna ukuba ngabebandla leli.
“IZANU PF yenza ekwanzakayo ngokulandela okufunwa ngabalandeli bayo. Ithatha isikhathi sayo lemali yayo ukuba kukhethwe abameli. Lokhu kutsho ukuba benza intando kazulu lowo osekela lelobandla.”
Ibandla leZANU PF ngempelaviki edluleyo lusungule uhlelo lwamaPrimary Elections ngokuhambisa amabizo ezigodlweni zezigaba ezitshiyeneyo zelizwe lapho okukhethwe khona amabizo asiwa eHarare lapho amele acubungulwe zingatsha zaphezulu zebandla leli.
Abe Movement for Democractic Change ekhokhelwa nguMnu. Douglas Mwonzora bathi bona bazaqhuba olwabo ukhetho olwama Primary elections ekupheleni kwayonale inyanga.
AbeCitizens Coalition for Change bona bathi kabasoze baba lokhetho lwamaPrimary Elections besithi uzulu emangweni etshiyeneyo yelizwe uzakhetha ukuthi ufuna ukumelwa ngubani kukhetho lwamalunga edale lephalamende lamakhansila olukhangelelwe ukuqhutshwa ngoNtulikazi lonyaka.