HARARE - Ibandla leCitizens Coalition for Change, elikhokhelwa nguMnu. Nelson Chamisa, lithi kumele iZimbabwe Electoral Commission yengeze insuku zokubhalisa abantu abazavota lonyaka ngenxa yemitshina yabo engasebenzi kahle njalo lokusilela komlilo kagetsi lokunye.
Lokhu kwethulwe nguNkosazana Fadzayi Mahere, isikhulumeli sebandla leCCC, othi kumele iZEC iqhubekele phambili ngohlelo lweMobile Voter Registration, oluqale ngeSonto njalo oluzagqitshwa ngeviki ezayo.
UNkosazana Ellen Shiriyedenga, umsekeli kanobhala wohlangothi olubona ngezokhetho kubandla leCCC, uyakusekela lokhu.
UShiriyedenga uthi kunengi abakuncomayo okwenziwa yiZEC.
Lanxa abeZEC bethule umbiko kunsukwana ezisanda kwedlula belandisa ngezinye zenkinga abahlangana lazo okufana lalezo ezivezwe ngabeCCC, abakatsho lutho ngodaba lokuthi bazokwengeza kumbe hatshi insuku zokuqhuba umsebenzi wabo.
Kasenelisanga ukukhuluma loMnu. Justine Manyau, umqondisi wezemibiko kukhomishini yeZEC obengaphenduli umakhalekhukhwini. UMnu. Bekezela Gumbo, okunhlanganiso yeZimbabwe Democracy Institute, uthi akumangalisi okucelwa libandla leCCC.
UMnu. Charles Nyoni, olwela ilungelo loluntu, uyakusekela lokhu. Okwamanje kulabantu abedlula izigidi eziyisithupha asebebhalisela ukuvota kukhetho oluzayo.