Ele Botswana likhala ngenani eliphezulu leziphepheli ezingena zivela kweleZimbabwe, inengi lazo kuyizizalwane zeDemocratic Republic of Congo ezithi zibalekela indlala enkambeni yeziphepheli eyeTongogara Refugee Camp.
Umphathintambo kahulumende obona ngeziphathelane lemithetho kweleBotswana, uMnu. Machana Shamukuni uthi ilizwe lakhe lisindwa linani elingena livela kweleZimbabwe lizodinga ubuphepheli.
Lezi yizizalwane zamazwe afana le Democratic Republic of Congo, Somalia kanye lezinye ebezihlala enkambeni yeTongogara Refugee Camp eZimbabwe.
Inengi labo lithi lifuqwa yindlala, njalo lifika litshele abeBotswana ukuthi lifisa ukuntshintsha ilizwe lobuphepheli.
UMnu. Shamukuni usanda ukutshela idale lephalamende kweleBotswana ukuthi kusobala ukuba impilo ingcono enkambeni yeziphepheli eyeDukwi engaphandle kwedolobho leFrancistown
Uthi nyakenye kuphela, kufike abedlula amakhulu ayisithupha bekhalela ukuphiwa ubuphepheli kweleBotswana.
IZimbabwe yona yabika ukuthi iziphepheli, ikakhulu ezidabuka elizweni le DRC, ziyabaleka enkambeni yeTongogora, njalo akwaziwa ukuthi ziyakuphi.
Abanye abafika kweleBotswana ngaba balekela udlakela lwenzondo eyokukhethana ngobuzwe kwabansundu, olwe xenophobia olubhahe kweleSouth Africa.
EleBotswana likhanga iziphepheli ngoba lilomnotho ongcono njalo kusaphileka uma kuqathaniswa lelizwe leZimbabwe, kutsho abanye abeZimbabwe abahlala kulelolizwe.
