HARARE - Ibandla leZanu PF lithi lithakazelela indlela okuqhutshwa ngayo ukhetho lwama primaries ngesikhathi kulungiselelwa ukhetho oluzakwenziwa lonyaka.
Ngakwelinye icele amabandla aphikisayo, agoqela eleCitizens Coalition for Change, Movement for Democratic Change leZapu, athi azakwenza inhlelo ezifanayo lobanje eleCCC lingakhangelelanga ukusebenzisa ingatsha zalo ekudingeni abazalimela kukhetho lwamakhansila labazamela idale lephalamende.
Omunye wabahambise igama lakhe, nguMnu. Edgar Phiri, ofuna ukuncintisa ukuba ngukhansila kaWard 32 eZhombe.
“Ibandla libandla elenza lokho okuthandwa ngabantu. Bathatha abantu abafunwa ngabantu. Siyathaba nxa sibona lokhu okwenzakalayo”
Lokhu kusekelwe nguMnu. Mabutho Moyo, okudale laphezulu leZanu PF ele Central Committee, odinga ukuncintisa koBulawayo.
“Ibandla leZANU PF selingule ukhetho, njalo uhlelo lolu luyasitshengisa ukuba silibandla elizimiseleyo. Kasikhononi ngohlelo lolu njalo sizimisele ukunqoba”
UMnu. Swithern Chorodza, okubandla leCCC, uthi ibandla lakhe lisalungisisa indaba zokukhethwa kwabameli njalo lidinga abantu abazavota esithi ukhetho lungabizwa loba yiliphi ilanga bazanqoba.
“Sizadinga abameli bethu kuseseduze nje. Kudala salungiselela ukuba sinqobe kukhetho thina. Ungabiza ukhetho namhla nje iCCC iyanqoba.Ungabisa ukhetho loba kusasa siyanqoba.”
Isikhulumeli seMDC-T, uMnu. Witness Dube, uthi basaphatheke kumsebenzi wokukhuthaza abantu ukubhalisela abazavota.
“Ugatsha lwethu lozokhetho lugcwele indawo yonke njengokunquma kwe Standing committee ukuthi kumele sibona ukuthi uMbimbitho ephela siyabe sikhankasele ukhetho.”
Ekhuluma ese Kwekwe epulazini lakhe ngempelaviki, uMongameli Emmerson Mnangagwa, wazise ukuba akusensuku zatshwala engakabeki ilanga lokhetho lwalonyaka.
Abantu abamangalise abanengi bagoqela owake waba kukhomitshini yeZEC, uMnu. Qhubani Moyo, ofuna ukuncintisa ukumela ibandla leli eInsiza, isikhulumeli sebandla leli uMnu. Tafadzwa Mugwadi, ofuna ukumela ibandla leli eBuhera, loMnu. Scott Sakupwanya, ongukhansila eMabvuku ofuna ukumela ibandla leli njengommeli weMabvuku ephalamende.
Ngesikhathi iStudio 7 isiya emoyeni abammeli abagoqela uMnu. July Moyo eRedcliff, uMnu. Owen Ncube eGokwe-Canna loMnu. Edmore Samambwa, ofuna ukumele ibandla eZhombe besebevunyelwe ukuncintisa bengaphikiswanga, lobanje kulabatshwane abakhonona ngohlelo lolu lobanje bengafunanga ukuthatshwa amazwi.
IZANU PF ibike ukuba izagqiba uhlelo lwayo lokubuthanisa amabizo alabo abalesifiso sokuncintisa kuthi ukhetho lwama primary elections ngokwalo lwenziwe ngoMgqibelo weviki ezayo.